Pynthikna u President ka MFA ba yn ïoh pynlong ka JN Stadium ïa ar tylli ki jingïalehkai bar ri
Shillong, Rymphang 17: U Bah Hamletson Dohling, uba dei u President jong ka Meghalaya Football Association [MFA], ha ka sngi U Blei u la pyntip ba ka nongbah Shillong kan sa ïoh ban pdiang bad pynlong ïa kawei naki jingïalehkai AFC qualifier ha u bnai ban wan (Lber) jong une u snem 2025.
ïa kane la pynthikna hadien ba ka All India Football Federation (AIFF) ka la mynjur ban jied ïa ka Jawaharlal Nehru Stadium, Polo, Shillong ban pynlong ïa ki ar tylli ki lympung ïalehkai phutbol jong ka Ri kaba kin hap ban ïakhun lyngba ka FIFA International Window.
Haba pyntip ïa kane ka khubor, u Bah Hamlet Dohling u la ong, “Ka All India Football Federation (AIFF) ka la mynjur ïa ka Jawaharlal Nehru Stadium ha Polo ban pynlong ïa ka jingïalehkai AFC qualifier ha u bnai ban wan.”
“Ka JN Stadium ka la pynkhreh ban pynlong ïa ka jingïalehkai qualifier jong ka India pyrshah ïa ka Bangladesh na bynta ka AFC Asian Cup 2027 ha ka 25 tarik u Lber bad ka jingïalehkai paralok jong ka India pyrshah ïa ka Maldives ha ka 19 tarik u Lber 2025,” u la bynrap.
Lah ban kdew hangne ba ka kynhun ïalehkai phutbol jong ka ri India kan sdang ïa ka jingïakhun knieh rung ba khatduh jong ka AFC Asian Cup Saudi Arabia 2027 pyrshah ïa ka Bangladesh ha ka 25 tarik u Lber. Shuwa kane, ka ri India kan ïakhun pyrshah ïa ka Maldives ha ka jingïalehkai paralok ba la buh ha ka 19 tarik u Lber, ha madan JN Stadium, Polo, Shillong. Baroh ar tylli ki jingïalehkai kin long ha ka por 7:00 baje janmiet.
Mynta ka kynti ka kynhun India ka la shah thup ha ka Group C na bynta ki jingïakhun knieh rung sha ka AFC Asian Cup 2027 ban long ha Saudi Arabia. Kiwei pat ki kynhun ha kane ka Group ki long ka Hongkong, Singapore bad Bangladesh.
Kan dei ka sien kaba nyngkong ïa ka JN Stadium Shillong ba kan ïoh pynlong ïa ka lympung ïalehkai phutbol bar ri naduh ba la pynbha ïa katei ka stadium. Kane ka stadium kaba ngiam palat 15,000 ngut ki nongpeitkai ka la ju ïoh ruh ban pynlong ïa ki lympung ïalehkai klob bapher bapher jong ka Ri kum ka I-League, Durand Cup, bad ruh ha ka Indian Super League bad kiwei kiwei.