Pynthikna u President ïa u Bah Olan Suiñ kum u kyrtong ka UDP na Mawsynram

Mawsynram, ‘Nailar, 09: Ki paidbah nongkyrshan jong ka United Democratic Party (UDP) ha Mawsynram Constituency kaba hapoh ka jingïalam jong u Bah Olansing Suin ha ka sngi Balang ki la poi da ki hajar ngut ha ka jingïalang ban pynskhem ïa ki nongkitkam jong ki lai tylli ki kynhun kata jong ka Parent’s Body, ka Women’s Wing bad kumjuh ruh jong ki Youth’s Wing, ha kaba ïa ka jingïalang la pynlong hapoh jong ka Seng Khasi Hall Dongneng, Mawsynram.
Ha kane ka sngi ka United Democratic Party (UDP) Mawsynram Circle ka la pdiang sngewbha ïa kiba la wan pynïasoh bad ki ban sa long ki nongkyrshan ba pura jong ka UDP kata na ka NPP, INC, BJP, PDF bad na kiwei de ki party.
U President jong ka UDP Central Body u Bah Metbah Lyngdoh uba dei ruh ha kajuh ka por u Lamphang jong ka Meghalaya Legislative Assembly haba kren ha ka jingïalang u la ong ba ka UDP ha Mawsynram mynta ka la nangkhlaiñ namar ka jingwan ban pynïasoh jong kiwei de ki nongkyrshan. U la ong ba ka long kaba donkam ba kum ki nongïalam jong ka party kin nangïai trei shitom shuh shuh wat hapdeng ki jingeh kiba bun ba kin sa ïa kynduh ha ka jingpyntyllun ïa ka kam.
“Haba ka kam saiñhima sima ha kine ki sngi ka la long kaba i duh jingkyrmen na ka bynta ka lawei jong ka ri bad ka jaidbynriew namar ka jingkren briew jong ka pisa ha kaba ki briew kiba don kyrhai ka pisa ki la shu thied beit beit ïa ki briew ban long ki nongkyrshan jong kano re kano ka party,” ong u Bah Metbah.
U la kyntu namarkata, ba kum ki nongtrei party bad ki nongkyrshan, kaba donkam mynta ka long ba haba trei ïa ka kam ki dei ban trei da ka jingieit, jingaiti lut bad ïeng skhem ha ka nongrim khnang ba kiwei ki lah ban don ka jingshaniah. U la pynsngew ruh ba haduh mynta kiba bun ki paidbah ki la sdang ban phai khmat sha ka UDP ban don ka jingïatreilang bad ban ai ruh ka jingkyrmen ba kan sa long kawei na ki party ban sa synshar ha u snem 2023.
Ha kaba ïadei bad u nongïalam ne u kyrtong, u Bah Metbah u la pynpaw ba kum ka party ka donkam ïa ki nongïalam kibajan bad u paidbah bad u Bah Olan Sing Suiñ u dei uwei na kiba kum kita ki briew. Namarkata, u don ka jingkyrmen ba ki paidbah kin sa ai ka jingïatreilang nangne shakhmat ban pyntyllun ïa ki kam kiba bun bad ban pynkhreh shait shait ïa kane ka elekshon jong u snem 2023 namar mynta ka dang sah sa hynñiew bnai ei ei ban trei.
U la ïathuh ruh ïa ki katto katne ki bynta jong ka jingrakhe ïa ka jingïoh ïa ka Jylla Meghalaya ba pura naduh u snem 1970 ka la ïoh ïa ka Autonomous State bad ha u 1972 pat ka la ïoh ïa ka jylla ba pura. U la ïathuh ruh ba ka daw ba kongsan jong ka jingdawa ban ïoh la ka jong ka jylla ba pura ka dei namar ka la don ka jingthmu ban pynrung ba ka jaidbynriew Khasi, Jaiñtia bad Garo ba kin kren noh da ka ktien Assamese.
“Lada ngin kren noh da ka ktien jong kiwei bad ngin ieh noh ïa ka ktien la jong, kata ka jaidbynriew kan sa long kaba duh jait,” ong u Bah Metbah. U la kren da kaba shai ba ma u ryngkat ka party kin ïeng skhem ban ieit ïa la ka jong bad ban burom de ïa ka jong kiwei namar ka long kaba donkam.
U MDC ka Sohra Consituency u Bah Titostarwell Chyne uba long ruh u Chief Executive Member (CEM) ka Khasi Hills Autonomous District Council (KHADC) u la ong ba haduh mynta kum ka party kam shym don da kawei pat ka jingthmu hynrei kan sa ai beit ïa ka tiket sha u Bah Olan Sing Suiñ ba un long u kyrtong na ka Mawsynram Constituency.
U la ong ruh ba ka dei ka sien kaba nyngkong ban ïohi ba ha ïew Mawsynram yn kaweh ka lama jong ka UDP ha kaba kane ka dei ka dak jong ka jingkyrmen ban poi sha ka thong jong ka jingjop lyngba ka jingïatreilang bad trei shitom jong ki paidbah nongkyrshan.
U la ong ba kum ki nongkyrshan jong ka UDP kiba la wan mynta ka sngi ha kane ka jingïalang ki dei ban long ki briew kiba skhem ha ka jingmut jingpyrkhat namar nangne shakhmat kin sa don ki briew na kiwei pat ki party ki ban wan ban pynthame bad wan pynbiej da kumne da kumtai ha i por iba lyngkot bad kin sa wan tyrwa ruh da ki kam kiba bun rukom hynrei wat ai ba kum kine ki jingpynthame kin tuh noh ïa ka jingskhem jong ki ban don ha ka UDP. “Long kiba don ka jingïatylli, ïalong kawei ha kiba bun ki liang khnang ba kin nym ur ne kyllon noh tang ha ka shi khyllip mat lyngba ka jingshah pynbiej da ka pisa”, ong u bah Tituswell Chyne.
Ha kajuh hi ka sngi, na ka bynta ki nongkitkam kiba thymmai pat jong ki lai tylli ki kynhun treikam la pynskhem da u Bah Metbah Lyngdoh bad ïa ki nongkitkam ba hakhmat jong ka Democratic Party (UDP), Mawsynram Circle ki long u President Bah Olan Sing Suiñ, General Secretary Bah Rock Chester Thongni bad kiwei ki nongkitkam ba kynthup ruh ïa u Bah Suly Lyngdoh, u Ring Nongsiej, u Tan Wanniang bad u Lomes Marbaniang kum ki Adviser.
Katba ki nongkitkam jong ka UDP Women’s Wing ki long ka President Kong Kyntiewboklin Marngor, General Secretary Kong Sonababel Sohtun, katba jong ka UDP Youth’s Wing ki long President u Tamdorlang Risaw bad General Secretary u bah Rangkitbok Snaitang.
Ha kajuh ka sngi u Bah Metbah Lyngdoh u la pyllait paidbah ïa ka jingrwai jong ka Party ba la rwai da ka kynhun ‘Thunder’s Cave’.
La sakhi lang ha kane ka jingïllang da u Bah Eugenson Lyngdoh, MLA jong ka Mawphlang Constituency, u General Secretary ka UDP, Mawsynram Circle, bah Rock Chester Thongni, u bah Mon Sangma nongkyrshan barim jong ka INC, u bah Suly Lyngdoh, u bah Plas Iangjuh, MLA barim, u bah Tambor Risaw, President UDP Youths Circle, i kong Kyntiewlin Marngar, President UPD Women’s Wing, bad kiwei de ki ‘riew rangbah kiba dei na kiwei pat ki party kiba la wan ban pynïasoh bad ka UDP.