Shillong, Risaw 07: U Myntri Rangbah ka jylla u Conrad K. Sangma un sa leit jngoh ïa ki jaka kiba la shah ktah hapoh ka thaiñ Dalu, Atisia Songmong bad kiwei ki jaka kiba marjan ha ka sngi baar.
Ha kane ka sngi jong ka jingleit jurip jong u kan long ruh ïa ki bahaïing jong kiba la khlad noh kaba la jia ha West bad South Garo Hills, ha kane ka jingleit jurip yn synranlang da u Myntri ka sorkar, ki MLA, ki heh ophisar ban leit jngoh sha kine ki jaka.
La ong ba u Myntri Rangbah un leit ruh ban jngoh ïa ki jaka sah shipor ba la pynsah ïa kiba la shah ktah ha kane ka jingjia shlei um bad twa khyndew.
Na ka liang u Myntri Rangbah un pynlong ïa ka jingïalang khmih bniah bad ki bor pynïaid distrik jong ka West bad South Garo Hills ban khmih ïa baroh ki jingjulor ïa ka jingim briew bad kumjuh ruh ïa ki jingtei ha kine ki thaiñ.
Shuh shuh la ong ba u Myntri Rangbah ka jylla u la bthah ïa ki bor pynïaid distrik ban pynlait noh ïa ka pisa ai jingïarap mardor ïa kiba la khlad ha kane ka jingjia kaba sngewsih.
Na ka liang u Myntri Rangbah u la pynpaw ïa ka jingsngewlem ïa kito ki longïing kiba la duh noh ïa kiba ieid ba thoiñ ha kane ka jingjia kaba sngewsih.
La ong ba ka sorkar ka la pynthikna ban ai ïa baroh ki lad jingïarap bad ki jingsumar ïa kito ki nongshong shnong kiba la shah ktah ha kane ka jingjia. U Myntri Rangbah u la pyntip ruh ba baroh ki kam ban pynkhuid ïa baroh ki jingulor ka la sdang bad ban pynthikna ba baroh ki kam ban ïarap ki la ïaid shakhmat.
