Shillong, Naitung 08: U Myntri ka tnat Bording ka sorkar jylla u Abu Taher Mondal u la ïashim bynta ha ka prokram jingïasyllok bad ki Nokma bad ki tymmen ki san jong ki shnong haba ïadei bad ka jingsam bording hapoh ka shnong Aminda Rangsa, Gambegre, West Garo Hills. Ïa u Myntri la synranlang da u Sanjay Goyal, IAS, Commissioner & Secretary, Power Department ha ryngkatlang bad ki heh ophisar jong ka Meghalaya Electricity Corporation Limited (MeECL).
Ha ka jingkren jong u, u Myntri u la pynthikna ba ki jingeh ba la rah da ki nongïalam shnong yn shim khia bad ban leh ïa kaba donkam ha kaba u la ong, “Haba ki ophisar ki la don ha ka program, ki jingeh bad ki kam la lah ban ïakren. Ki kam ha sor bad nongkyndong mynta ki ïasynriem. Hapoh ka 5 snem, ka jingpynbiang ïa ka bording kam dei ban don ka jingktah. Dei ban buh ïa ka sub-station bad ïa ki voltage dei ban pynbha. La dep buh ïa ka Substation ba thymmai ha Damalgre bad hapoh ka 2 – 3 bnai dei ban pyndep. Ki la don 3 tylli ki shnong ha Gambegre ki bym don bording, bad ngin ïapeit ba ka bording kadei ban don noh. Ha ki por slap por erïong, pom pyrthat ka shait don barabor ka jingshah pynthut ha ka jingsam bording naba bun na ki sainar ki dkut bad ïa kane dei ban pyndep ha kaba nyngkong eh. Man la ki ïing ha ki shnong ki dei ban ïoh bording. Ki surok bad ki jingkieng kiba rit dei ban shna lyngba ka jingïasoh lang bad ka MGNREGS. Ki jingeh ba shah pynthut ka bording ka long ruh kaba shu jia ryngkhat.”
Ha kane ka sngi u Myntri ka tnat Bording u la khmih bniah ruh ïa ki kam ka tnat bad ki skhim jong ka Garo Hills bad u la bthah ïa ki ophisar ban pynneh ïa ka jingdon ka bording ha ka thaiñ khamtam ha kine ki por slap.
Katba u Commissioner and Secretary, Power Department, u Sanjay Goyal u la ong ba ïa kane ka jingïalang la pynlong ban sngap bad sngewthuh ïa ki jingeh ba la mad da ki paidbah khnang ban lah ban pyndep ïa kine ki jingeh bad jingduna. U la ong, “Kane ka jingïalang mynta ka sngi ka long ruh ha ka jingshim khia u Myntri Rangbah bad u Myntri ka tnat Bording uba peit ruh ïa ka tnat C & RD. Mynta ngi ïakren ha ki area-wise, block-wise ha kaba kum kino ki jingeh bad ki kam khamtam kiba ïadei bad ka tnat Bording. Ka MeECL, ka tnat Power ka pyrshang katba lah ban pynthikna ban ïoh ïa ka bording kaba lah ban shaniah, da kaba pynduna ïa ka jingshah pynthut ban ïoh ruh ka bording kaba biang bad ngi dang treikam halor kane. Ka la don ruh ka sub-station ha kane ka jaka bad kane hi kan pynthikna ïa ka jingsam bording kaba biang.”
