Pynthikna noh ïa u maw pud maw sam, dawa ki paidbah ka thaiñ Malangkona
![](https://mawphor.com/wp-content/uploads/2022/05/mawphor-1-2.jpg)
Nongstoiñ, Naitung 13: Ka jingïakren pynbeit ïa u pud u sam hapdeng ka Assam bad Meghalaya ha ka ka wat kaba nyngkong kiba hap ha ka hahim sector, kynthup ïa ki jaka ki jaka kiba hap ha West Khasi Hills naduh ka Tarabari, Gizang haduh Athiabari, kam shym la pynhun satia ïa ki paitbah, namar haduh mynta ka sorkar kam shym pat la wan ban sieh ïa ki mawpud maw sam, ban pynthikna kino ki jaka kiba dei hok hapoh ka West Khasi Hills bad kino ki jaka kiba la shah khynñiat sha Assam.
Ki rangbah shnong jong katei ka thaiñ ba kynthup ïa u bah Mamot Sangma Headman ka shnong Namtarabari kaba la ju tip kum ka Balsrik, u bah Salrak Sangma secretary ka shnong Borsung, u bah Tonik Marak Headman ka shnong Damrangkona bad kiwei kiwei, haba ïakren bad u nongthoh khubor ki la ong ba ka jingkam jong ka sorkar Meghalaya, ba ïa kitei ki jaka la dep ïa pynbeit, kam shym la pynhun satia ïa ki nongsynshar shnong bad ki paitbah, namar ba ka por ka la ïaid haduh palat ar snem, hynrei wat tang uwei u mawpud ruh ym pat ïohi satia.
U bah Mamot Sangma u la ong ba naduh ba ki nongïalam jong ki Regional Committee on Border Dispute ki la wan ban jurip lang ha Tarabari, ki paitbah ki la kmen shi shibun bad ki da kyrmen ruh ba hadien ba ka jingïapynbeit, ka sorkar kan sa sieh noh syndon ïa ki maw pud maw sam, ban pynthikna ïa ki shnong kiba hap ha West Khasi hills bad kiba hap sha Assam.
U la ong ruh ba ki Nongsynshar jong ki shnong ha katei ka thaiñ naduh Thanghula, Tarabari, Namtarabari, (Balsrik) bad kiwei kiwei, ki la lum da ki jingïalang paitbah la bun sien bun wat, ha kaba baroh ki paitbah ki la kwah eh ba ka sorkar kan pynthikna noh da ki maw pud kiba biang, khnang ba kin sngew skhem haba ki trei ki ktah bad ki rep ki riang ha ki jaka jong ki.
U bah Tonik Marak Headman jong ka shnong Damrangkona, u la ong ba baroh ki shnong ki thaw ha katei ka thaiñ ki ïoh ïa ki lad jingïarap kiba la ai da ka sorkar Meghalaya lyngba ka Mawshynrut C&RD Block bad na ki ophis treikam bapher bapher jong ka West Khasi Hills, kum na ka ophis jong u Deputy Commissioner, MECL, MNREGS bad kiwei kiwei, hynrei ka sorkar Assam kam don bynta ei ei wat tang khyndiat ruh.
Ha kaba ïadei bad ka jingpynthikna ïa u pud u sam pat u bah Salrak Sangma Headman ka shnong Borsung, u la ong ba ki rangbah shnong jong katei ka thaiñ ki dawa ba u Conrad Kongal Sangma Myntri Rangbah bad ka sorkar jong u, ba kim dei ban ïalehkai ne thok ïa ki paitbah ba ki la dep ïapynbeit ïa u pud u sam. Namar lada kin shu thok ne pynbiej khlem da pyni da ki kam ki paitbah kin dang sah pyndik ter shiter ha ki briew ka sorkar Assam.
Kumta lada ka sorkar ka kwah ban pynkut noh ïa ki jingeh ha katei ka thaiñ, ka dei ban wan sieh noh ïa ki mawpud mawsam ba thikna, khnang ba ka Assam kan ym nud shuh ban wan tuklar ne pyndik ïa ki paitbah na ka por sha ka por.