Shillong, Jymmang 12: Ka Sorkar Pdeng kala pynthikna da ka jingthoh sha ka Sorkar Meghalaya ba la pyllait noh ïa ka Jylla Meghalaya na ka jingtreikam jong ka Common University Entrence Test (CUET) na ka bynta ka samoi 2022-2023.
U Myntri ka Ministry of Education u Dharmendra Pradhan, ula phah ïa ka jingthoh sha u Myntri Rangbah ka Jylla Conrad Kongkal Sangma hynne ka sngi palei ba pynthikna ba baroh ki College kiba iasoh bad ka North Eastern Hill University (NEHU) kila lait na ka jingtreikam ka CUET mynta u 2022-2023.
Ha kane ka shithi, u Dharmendra ula ong “Haba mynjur ïa ki jingsngewkhia bala pynsngew da ma phi (Conrad) kum ka jinglong ki jaka, ki jaka lum, ki jaka ba iajngai, ki jingbym biang ki kot digital bad kiwei kiwei, ki college ba iasoh bad ka NEHU kin ïai bteng beit ïa ka jingpynrung klas (Under Graduate) kumba ju leh baroh shikatta ha ka jaka jong ka CUET”.
Lah ban kdew hangne, ka Jylla Meghalaya kala tynruh ïa ka Sorkar Pdeng ban pyllait noh ïa ka Jylla Meghalaya na ka jingtreikam jong ka CUET namar kiba bun ki jingeh ba mad da ki samla pule ka Jylla.
U Myntri Rangbah ka Jylla Conrad Kongkal Sangma ha ka 32 tarik Jymmang, 2022, ula ïakynduh ïa u Dharmendra Pradhan ha Delhi bad buh ka jingkyrpad ban pyllait ïa ki samla pule ka Jylla na ka jingïakhun ïa ka CUET kynthup ïa ki College shimet bad College sorkar kiba iasoh bad ka NEHU.
“Kane ka shithi u Myntri ka Sorkar Pdeng kala wan hapdeng ka jingïalang jong ka Meghalaya Democratic Alliance Coordination Committee (MDACC), kaba dang ïakren ïa kane ka mat bala wanrah da ki paralok ba iatreilang ha ka sorkar” ong u Conrad.
“Ka shithi kala wan ha ka khep kaba biang eh bad u Myntri ka Ministry of Education ula kren shai bha ba baroh ki College ki lah ban ïai bteng beit ïa ka jingpynrung klas kumba ki leh leh baroh shikatta, kaba mut ba ka CUET kan nym treikam satia” ula bynrap.
