Shillong, Nailur, 07: Ka Sorkar Jylla kaba la thmu ban pynmih ïa ka jingpynbna na ka bynta ban pyntreikam ïa ka Criminal Procedure Code (CrPC) bad Code of Civil Procedure (CPC) ha ka jylla baroh kawei ka la pynthikna ba kan ym don kano kano ka jingktah ïa ki District Council Courts jong ki lai tylli ki Autonomous District Council (ADC).
U Myntri Rangbah ka Jylla u Conrad Kongkal Sangma ha ka jingïakren bad ki lad pathai khubor hadien ba la wai ka jingïalang Kynhun Myntri u la ong, “ngi la khot badn ïathir sani bha ha ka jingïalang bad ki Chief Executive Member jong ki Autonomous District Council (ADC) hadien ba ki la pynpaw ïa ka jingsngewkhia halor kane.”
“Ngi la bthah ruh ïa ki lai tylli ki ADC ba kin phah ïa ka jingai jingmut bad na ka liang jong ka KHADC bad ka JHADC ki ladep phah ïa ka jingthoh katba na ka liang jong ka GHADC ka la shu ai jingtip da ka ktien,” la ong u Sangma.
“Hadien ba ki la pynshai halor ka jingsngewkhia kaba ki don, ngi la kdew shai bha ha ka jingpynbna (Notification) ïa ki kyntien kiba la ong kumne: Ha kaba ïadei bad ka jingpynïakhlad ïa ka Bishar (Judiciary) na ka Synshar (Executive) bad da kaba pyntreikam ïa ka iktiar ba la pynkup ha ka kyndon jong ka sub section 2 jong ka section 1 jong ka Code of Criminal Procedure, 1973 Act II of 1974, u Lat ka Jylla Meghalaya u sngewbha ban pyntreikam ïa ki kyndon jong ka Code of Criminal Procedure, 1973 sha baroh ki Kashari kiba don hapoh ka Jylla Meghalaya. Ki District Council Court kin dang ïai bteng ban ïoh ïa ka bor ka iktiar hapoh ka para 4 bad 5 jong ka Khyrnit Bahynriew ka Riti Synshar ka Ri India. U Lat ka Jylla Meghalaya u la bthah shuh shuh ba watla kum ki aplikeshon ba la pdiang da ki District Courts ha baroh kawei ka Jylla Meghalaya hapoh ka Rules for Administration of Justice and Police of Khasi Hills and Jaintia Hills, 1937 bad ka Rules for Administration of Justice and Police in Garo Hills, 1937 yn pyntreikam hapoh ki kyndon jong ka Code of Criminal Procedure, 1973.”
Ha kajuh ka rukom, tang ïa ka Code of Civil Procedure, 1908 la pynkylla hynrei ka jingpynbna kan sah beit kumjuh, la ïathuh u Sangma.
