Shillong, Naitung 13 : Ka National People’s Party (NPP) ka la pynkhreh mynta ban sei syndon da u President jong ka East Khasi Hills Congress, Bah Kennedy Khyriem ban aireng na katei ka constituency ha ka elekshon MLA kaban long ha u snem ban wan.
Katei ka sienjam ba ka NPP ka shim, kadei hadien khyndiat sngi ba na ka liang ka Congress ka la pynbna ba u Bah Loverson Kurbah un dei u kyrtong ka party ha katei ka elekshon kaban long ha u 2023.
Ki khubor ba thikna na ki nongïalam jong ka NPP ki la ong ruh ba mynta ki ap sa tang ka por ban pynbna noh ïa ka kyrteng jong utei u rangbah kum u kyrtong.
Ha kajuh ka por pat, u MDC ka NPP na Mawphlang, Bah Lamphrang Blah ba dei ruh u Chairman jong ka KHADC haba kren bad ki lad pathai khubor u la ong, “Na ka liang ka party ngi la pynkhreh ban pdiang burom ia i Bah Kennedy Khyriem ryngkat ki nongkyrshan jong i ha ka 26 tarik ha kaba ki nongïalam ka party kin wan ban donlang ha katei ka sngi.
Lah ban kdew hangne, u Bah Blah u dei u MDC ba la jop bunsien na ka tiket Congress hynrei ha ka elekshon shiteng samoi na Mawphlang u la mih noh na ka Congress ban leit ïa khun pat na ka NPP.
Haba jubab ïa ka jingkylli, u Bah Blah u la ong, “Na ka bynta ban jied ïa u kyrtong ban aireng ha u 2023 ka shong ha ka party ban rai.”
Katkum ka jingong jong u la sngewthuh beit ba kin ailad beit ïa u Bah Kennedy uba dei ruh ha kajuh ka por u MLA barim na ka thaiñ.
Utei u MDC u la ong ruh ba haduh mynta hi, ki la tikna ba ka jingïakhun hi kan long beit hapdeng u MLA ba mynta bad u kyrtong jong ka party ha ka elekshon kaban sa long shen ha kine ki khyndiat bnai.
