Pynthikna ka Byndihati CSC ban kiew kyrdan da kaba rung final haka 1st Division 2025 jong ka EJHDFA

Jowai, Risaw 06: Ka jingïakhun Semi Final jong ka lympung ïalehkai phutbol kyrdan First Division League 2025 bala pynïaid daka East Jaiñtia Hills District Football Association (EJHDFA) kaba la long hynne ka Lah Sngi U Blei, 06 tarik u Risaw, ha madan Artificial Diengshynrum, Khliehriat.

Ka Semi Final ba nyngkong la sakhi ïa ka Byndihati CSC kaba la pynliem noh ïaka Musniang SC ha ka jingïashut penalty (tie breaker) hadien ba ka jingïalehkai ka la kut ha ka jingïakhaid da mar 2-2 kol.

Haba phai sha ka jingïakhun, ka Byndihati CSC ka la lamkhmat da ar kol lyngba u Bhalangme Tariang (24’) bad u Tenligent Dkhar (52’) shuwa ba ka Musniang SC kan pynkhihwin ïa ka jingïalehkai da kaba pynïakhaid lyngba u Eleven Biam haka minit ba 76 bad u Nikerda Dkhar haka minit ba 90 ban pynbor ïa ka jingïakhun sha ka Tie Breaker.

Ha ka Tie Breaker ka Byndihati CSC ka la lah ban jop da 5-4. Kane ka jingjop ym tang ba ka la pynskhem ïa ka jaka ha ka phainal na ka bynta ka Byndihati CSC, hynrei ka la pynthikna ruh ïa ka kynhun ban kiew sha ka kyrdan Super Division ha u snem ban wan.

Ka jingïakhun Semi Final ba ar kan long ha kane ka sngi Ba-ar, 07 tarik Risaw, hapdeng ka Rymbai Synrang Shahkhaiñ SC pyrshah ïaka Wahiajer Narpuh SSC haka por 2 baje nohphai sngi.