Shipor ka jylla i kumba ka la sdang ban klet ïa ka khlam COVID bad ïa ki tyrsim ba shyrkhei jong ka kumno ka pynsyier ïa ki paidbah ka jylla haduh ba bun ki longiing ki la im sah mynta ha ka jingsyier bad ka jingrit mynsiem haba ki kynmaw ba kim lah wat ban leit sakhi ïa ka jingleh niam khatduh ïa la ki baieit ba thoiñ kaba ki im lang ha iing man la ka sngi hynrei ha ka por ba ki khlad pat kim ïoh wat tang ban ktah ïa ka synduk ruh.
Kumta, khnang ba kum katei ka apot kan ym wan shuh ha ka jylla, ka dei ka kamram jong baroh ban shimlang ïa ka jingkitkhlieh da kaba ïada da lade ïalade ha shwa ba ka por kan dier. Ka kaiphod jong ka sorkar kaba mih ha ka 16tarik ka la pynisyier ïa ka jinglong jingman jong ka khlam COVID ha ka jylla namar tang ha kane ka sngi ki la don haduh 31 ngut kiba ïabit thymmai bad na kine haduh 23 ngut ki dei tang na East Khasi Hills. Katei ka pyni ba ka jinglong jingman jong ka khlam kam pat kut satia bad ka lah ruh ban syllad biang sa shisien lada ym lah ban ïada bad khanglad ïa ka ha ka por kaba biang.
Ki lad ki lynti kiba bun lada ki paidbah ki kloi ban snohkti lang naduh mynta lym kumta ka jingma ka ap lypa lada ym husiar bad peitngor. Ka sorkar kadei ruh ban peitngor bad shim lypa ki lynti kiba pyrkhing naduh mynta katba ka bor jong katei ka khlam kam pat pur kylleng kylleng. Lehse ki paidbah ruh kin ym khnium lada ka sorkar ka pyntreikam biang ïa ki kyndon ba pyrkhing naduh mynta khnang ban lait na ka khangdam lada jia ba ka jingdon ki briew kiba ïabit ïa ka ki nang bun.
Baroh ki ïohi ba ka jingwan jong ka khlam ha ki arsnem ba la dep ym tang ba ka ktah ïa ka ïoh ka kot, hynrei ka ktah ruh ïa ka bor pyrkhat bad ka pynkylla lut wat ïa ka kamai kajih ha ki liang baroh la ka long naduh ki heh spah bad haduh kiba duk ba rangli. Kaba kham i syrtok eh kadei ba kane ka khlam ka pynjynjar sat haduh katta katta ïa u duk u suk uba im da kaba kamai mynstep bad bam da miet.
Kine ki jingjïa baroh kiba la jia ha kine ki arsnem ba la dep, ka dei ban pynkyndit bynriew ïa ki paidbah ba lada kim lah hi ban ïada dalade ïalade na ka jingphriang jong katei ka khlam khlem artatien ka khangdam kan sa urlong biang bad lehse kan sa pynsyrtok arshah na kaei kaba la mad mynshwa.
Lada kren hi ïa ka jingshisha ka khangdam ka lah ban ktah ïa ka kamai kajih bad ka bam ka dih ha ki iing ki sem hynrei ka jingphriang jong kane ka khlam ka buh ha ka jingrit mynsiem, ka jingkhuslai bad khamtam eh ka jingtieng ïoh kumno re kumno lada iwei na ki bahaiing i ïoh COVID ka jingjynjar ka jingkhuslai kan dei ïa baroh kawei ka iing ka sem.
Kumta, sngew ban ai jingmut bad kyntu lang ïa baroh ba ha kane ka kynti ruh ki nongshong shnong ki dei ban ïa tylli lang ryngkat ryngkat bad ki bor shnong bad ruhki bor sorkar khamtam eh ban pyndep ïa ka tika na ka bynta ka jingshngaiñ ki iing ki sem, ka shnong ka thaw bad ruh ka imlang sahlang.
