Pynspong ka Hima 12 Lyngdoh ïa u Bah EK Lapang kum u Rangbah Shnong ba pura ka shnong Saiden
Nongpoh, Risaw 02: Kumba ka Hima 12 Lyngdoh, Elaka Nongpoh Sirdarship, ka ju pynim ïaka dustur ba ka Spong bad ka Phali ki dei ki bynta ba kongsan ban pynkup bor bad pynskhem ïa ki nongsynshar shnong bad ki It ki Hima shuwa ba kin shim ïa ka jingkitkhlieh ba pura kum ki nongsynshar shnong, mynta ka sngi ka Hima 12 Lyngdoh, Elaka Nongpoh Sirdarship, kala pynskhem ïa u Bah EK Lapang kum u Rangbah Shnong ba pura bad u Bah Evansis Jones Myrthong Secretary Shnong jong ka shnong Saiden lem bad ki dkhot ka Executive Committee jong ka shnong.
Kane ka jing pynskhem ka wan hadien ba ki paidbah nongshong shnong jong kitei ki shnong kila jied thymmai ïa ki nongïalam shnong, namar ba ka samoi treikam jong ki nongïalam ba rim kala kut.
Ïa kane ka jing pynskhem la pynlong ha iing Dorbar jong ka Shnong Saiden ha kaba la wan ban pynspong ïa kitei ki nongïalam shnong da u Bah Stoin Syngkli bad u Bah H Namsaw kiba dei ki myntri jong ka Hima 12 Lyngdoh, Elaka Nongpoh Sirdarship naka bynta ban pynkup bor bad pynskhem ïa ki nongïalam thymmai jong ka Shnong Saiden, ha shwa ba kin shim pura ïaka jingkitkhlieh ban bah ïaka lyngkor haka kam shnong, ha ryngkat ka kyrkhu kyrdoh.
U Bah Stoin Syngkli haba kren ha katei ka sngi u la pynpaw ka jingsngewkmen kaba khraw bakum ka Hima kala ioh ban pynkup bor ïa u Rangbah Shnong katkum ka riti dustur bala buh naduh kulong kumah ryngkat ka spong ka phali kaba kdew shai bala ithuh ïa u da ka Hima kum u Rangbah Shnong jong katei ka shnong kaba hap hapoh ka jing synshar jong ka Hima.
U la ai ruh ka jingkyrkhu kyrdoh ïa u Rangbah shnong ba thymmai ryngkat bad ka kynhun ki nongïalam shnong ba kin lah ban trei kham bha ïaka kam kumba la bynshet haki bad kyrmen ruh shibun ki jingkylla kin wan lyngba kitei ki nongïalam ba thymmai bad bastad.
Naka liang u Bah EK Lapang kum u Rangbah Shnong u la ai ka jingkhublei ïaki paidbah kiba la ibit biang ïa u ban shimti ïaka lyngkor kum u Rangbah Shnong bad kyntu ruh ïaki paidbah ba kin ai ka jingïatreilang ha baroh ki liang ban wanrah shibun ki jingkylla hapoh shnong kumba la angnud ba kane ka shnong kan long kum kawei naki nuksa sha kiwei pat ki shnong haki liang baroh, u la bynrap.