Pynsniew dur ka jingjot jingpei ka surokbah ïa ka shnong Khliehriat, buh jingma ïa ki mynsiem briew

Khliehriat, Naitung, 02: Ka jingjulor ka surok national highway 6 ha sor bah Khliehriat ka la buh jingeh ïa ki nongleit nongwan, ym tang katta ka buh jingma ruh haba ïaid ki kali heh kiba kit jingkit bad ki kali rit ruh bad kumjuh ruh ki kali kit nongpang, la sakhi ba ka surok ka la dap da ki thliew ba heh- ba heh kiba dap da ka um ktieh ha ka por ba hap slap, kane ka wanrah ruh ïa ka jingnsiew dur ka sor Khliehriat ha kaba bun ki nongliet nongwan ruh ki sakhi ïa kane.
Ka jingjulor kane ka surok, kaba la long shaba palat ka ju wanrah ruh ïa ka jingdheng kali kaba khah khah ha sor bah Khliehriat, ki kali heh bad kumjuh ruh ki kali rit katba lah ki pyrshang ban kiar ban lait na ki thliew hynrei ym lah ban leh eiei namar ka surok ka la dap sa tang ki jingpei thliew ba dap sa ka um ktieh ha ka por slap.
Ka jinglong jingman kane ka surok, ka buh jingeh bad buh jingma ym tang ïa ki kali, hynrei ka buh jingeh bad buh jingma ruh ïa ki paidbah kiba leit sha ïew sha hat, kiba thied jingthied bad kumjuh ruh ïa ki khynnah skul kiba ju ïaid na kane ka jaka.
Kane ka national highway kaba na Khliehriat, ka dei ruh ka surok kaba da ki hajar ki kali ki ïaid lyngba namar ka dei ka surok kaba ki briew kiba na bar bad kiba na ki jylla ba mar jan ruh ki ju ïaid lyngba na kane ka surok bad kaba phylla ba watla ka NHAI ka maramot ruh, hynrei kane ka bynta jong ka surok ka julor man la u snem haba wan ka aiom slap, lehse lah ban dei na ka daw ka jingmaraot kaba tang dep rukom.
Nalor kata, ka jingbym biang ki nala tuid um ruh ka pynlong ïa ka um slap ban tuid pathar ha surok.