Jowai, Rymphang 27: Ka District Legal Services Authority, West Jaiñtia Hills District ka la pynlong ïa ka Legal Awareness Programme ha kane ka 26 tarik u Rymphang ha ïaw thymme, Jowai halor ka phang ban ai jingïada na ka jingshongkha khynnah.
Ïa kane ka prokram la pynlong kum shi bynta na ka 100-Days District-Wise Action Plan for Prevention of Child Marriages in Meghalaya, hapoh ka National Legal Services Authority (NALSA) (ASHA – Awareness, Support, Help and Action) SOP bad ka Bal Vivah Mukt Bharat Campaign.
Ka jingthmu jong kane ka prokram ka long ban pynsngewthuh paidbah naduh ki nongdie jingdie, ki nongleit ïew, ki kmie ki kpa, ki samla bad ki paidbah nongshong shnong shaphang ki jingma kiba lah ban mih na ka jingshongkha khynnah, la batai shaphang ki lad jingïada ïa ka hok jong ki khynnah bad ka bynta jong ka imlang sahlang ban khanglad ïa kum kine ki kam.
U ma F.B Passah, Assistant Legal Aid Defense Counsel, DLSA, West Jaiñtia Hills District ula pynpaw ba ka jingshongkha khynnah ka dang long kawei na ki jingeh kaba khraw ha ka District khamtam ha ki jaka nongkyndong, ka jingkyrduk, ka jingpep skul shiteng por, ka jingbym ïoh jinghikai ba biang ha ka imlang sahlang kiba dei ki daw bah jong ka jingshongkha khynnah.
Shuh shuh ula ai jingtip halor ki kyndon Prohibition of Child Marriage Act, 2006, ha kaba la ong ba ka rta shongkha katkum ka aiñ ka long 21 snem na ka bynta ki khynnah shynrang bad 18 snem na ka bynta ki khynnah kynthei bad kiba pynkheiñ ïa ki kyndon ki lah ban shah pynshitom tyngeh ha ki bor ka aiñ.
Ula pyntip ruh sha ki paidbah ba lada don kino kino ki khubor ne jingujor ha kaba ïadei bad ka jingshongkha khynnah, ki paidbah ki lah ban phone ha u Child Helpline Number 1098 lane ha u Court Fee Number Helpline 15100.
