Amlarem, Rymphang 17: Ka District Horticulture Officer, Jowai ha ryngkat ka jingïatreilang bad ka ophis Horticulture Development Officer, Amlarem kila pynlong ïaka prokram ai jinghikai shaphang ka skim ‘CM-ASSURE’ haka jingïalang bala pynlong ha Block Office Hall, Amlarem C&RD Block, West Jaiñtia Hills District.
Ha kane ka prokram la wan ban shim bynta da ki 40 ngut ki Rangbah Shnong ka thaiñ, kynthup ïa ki ophisar sorkar naduh u ma Trustful Phawa, Agriculture Development Officer (Market Intelligence), Jowai, ka kong Pleaseme Shylla, Nodal Village Data Volunteer, West Jaiñtia Hills, ka Lakidon Khonglah, Horticulture Development Officer, Amlarem, u M.N. Sangma, Horticulture Inspector, ka Ibankyntiew Dkhar bad ka Patricia Shylla kiba dei ki Farm Manager, Basin Development.
Ka CM-ASSURE (Chief Minister’s Scheme for Agricultural and Rural Support and Empowerment) ka dei ka skim jong ka Sorkar da ka jingthmu ban kyrshan borbah ïa ka ïew ka hat bad ka dor ka mur jong ki mar rep, khnang ba kan ïarap ïa ki nongrep kiba pynmih ïa u kwai bad u synsar.
Na ka liang ki ophisar kila batai shai ïa ki jingdonkam ban ïatreilang hadpeng ki nongrep bad ki nongthied kiba pynïaid ïew ïa ki mar rep, kumjuh shaphang ka rukom registration bathymmai kynthup ïaka jingthoh ïa u Number Phone, ka rukom treikam jong ka skim CM-ASSURE bad kiwei de.
La pynsngew ruh ïa ki bynta bad ka jingkitkhlieh jong ki Village Data Volunteer bad la sam ruh ïa ki number jong ki khnang ba ki nongrep kin ïoh jingtip shuh shuh. La ai jingbatai ruh shaphang ka rukom pynïaid ïew ïaki mar rep hapdeng ki nongrep bad ki nongthied kiba leit lum ïa ki mar jong ki na kino kino ki jaka.
Ha kane ka prokram la don ruh ka jingïaphylliew jingmut lang bad ki Rangbah Shnong kiba la kular ban ai ka jingïatreilang bad ban pynsngewthuh sha ki nongrep ba kin wan register ha ki shnong jong ki, na ka bynta ban ïoh shibun ki jingmyntoi.
