Pynsngewthuh ka State TB Officer ïa ki lad jingïada na ka jingpang TB
![](https://mawphor.com/wp-content/uploads/2022/05/mawphor-1.jpg)
Shillong, Risaw, 10: Ka ophis State Tuberculosis Officer, Meghalaya, lyngba ka National Tuberculosis Elimination Programme (NTEP) ka la pynlong ïa ka jingïakob banyngkong eh da ka jingïatreilang bad ka The International Against Tuberculosis and Lung Diseases (The Union) bad ka Department of Social Work, Women’s College, Shillong ha ka Lah Sngi u Blei.
Ha kane ka prokram la pynsngewthuh sha ki samla pule shaphang ki lad jingïada na ka jingpang Tuberculosis, bad ki lad jingsumar da kaba pynlong ïa ka jingïakob rwai, phawai bad ïakob dro.
U State TB Officer, Meghalaya u Dr. M. Mawrie haba kren ha ka jingïalang u la ong ba ki samla ki nongrah jingkylla bad pynsngewthuh sha ki bahaing hasem, sha ki paralok bad sha ka imlang ka sahlang kumno ban ïada na ka jingïabit ïa ka jingpang. U la ong ba ka sorkar ka la kut jingmut ban ai ïa kaba bha tam na ka bynta ka jingkoit jingkhiah hapoh ka jylla.
Ka District TB Officer, East Khasi Hills District ka Dr. B. Shanpru ka la ai jingtip halor ka thong jong ka National Tuberculosis Elimination Program bad kumno ban pynduna ïa ka jingïabit ïa ka jingpang TB ha kine ki khyndiat snem. Ka la ïaiban ruh ba ki samla pule jong ka Social Work ki long ki atiar kiba la lah ban pynpoi ïa ka khubor sha ki shnong ki thaw.
Ka Principal Women’s College ka Dr. Ratnadeep Roy, ka la ïaroh ïa ki jingtreikam jong ka Social Work department kaba la ïatreilang bad ka State TB Office bad shim ruh ka jingsmai ban pynlong ïa ka Jylla Meghalaya kaba lait na ka jingpang TB.
Ki samla pule jong ka Socal Work Department ka Women’s College ki la pyni ïa ka jingshad halor ka jingpang TB ba la thaw da ka KHMIH creative Society lyngba ka jingïalam lynti jong ka District TB Office, West Khasi Hills.
Ki don 20 ngut ki nongïashim bynta ha ka Phawar bad ka jingïakob rwai bad 18 ngut ki la ïashim bynta ban dro bad airong ha ki kynroh da kaba thoh ruh ïa ki khubor kiba ïalap shaphang jingpynkhiah ïa ka jingpang TB ha ki 18 tylli ki jaka bapher bapher jong ka Jylla.
Ki nongjop ha ka jingïakob phawar ki long ka Samanbha Haley Dkhar, ka Distant Alive Group bad ka Heibormi Veteran Group. Ki nongjop ha ka jingïakob dro bad airong ha ki kynroh ki long u Thorman G Momin, ka Elizabeth M Sangma bad u Winsterfield Khonglam. Ki nongjop ha ka Phawar ki long ka Greenfield Self Help Group, Mawkynrew, ka kynhun Ki Sur Shynna
bad ka Rapsbun Nursing School, Shillong.