Jowai, Nailur 22: Ka Meghalaya Bharat Scouts & Guides, West Jaiñtia Hills ha kine ki ar sngi lynter kala pynlong ïa ka prokram pynsngewthuh ïa ki khynnah skul ka sor Jowai, halor ka jingdonkam ban wanrah ïa ka jingkhuid jingsuba da kaba pyntreikam ïa ka Solid Waste Management.
Ïa kane ka prokram la pynlong ha ryngkat ka jingïatreilang ka Jowai Municipal Board bad ka District School Education Officer, West Jaiñtia Hills ha ki ar sngi lynter katta naduh hynnin ka sngi 21 tarik bad mynta ka sngi 22 tarik u Nailur.
Na ka liang ki Scouts Master-Guides Captain jong ki Unit bapher bapher kila wan sha kane ka prokram ba ar sngi da ka jingwan ïashim bynta lang jong ki khynnah skul bad ki nonghikai.
Kitei ki Scout Master-Guide Captain haba ai jingkren kila pynkynmaw ïa ki khynnah skul shaphang ki San tylli ki ‘R’ kita ki long (Refuse, Repair, Recycle, Reduce, Reuse). Ha ka juh ka por la kyntu ïa ki khynnah skul ba kin long kiba lehkhuid shwa na la ïing bad kin long ruh kum ki nuksa ïa kiwei.
Ki skul kiba la buh ka thong ban pyndep ïa kane ka jingkular kila don haduh 16 tylli katba ki Unit Leaders jong ka Meghalaya Bharat Scouts & Guides, West Jaiñtia Hills kiba la wan ban ïadon bynta ki don haduh 25 ngut kynthup ïa ki Scouts Master, Guides Captain wa ki Rovers-Rangers.
