Pynsngewthuh ka KVK halor ka aiñ thymmai jong ki nongtrei 100 sngi ha nongkyndong

Jowai, K’Lyngkot 03: Ka Krishi Vigyan Kendra (KVK), Jaiñtia Hills mynta ka sngi 3 tarik u Kyllalyngkot kala pynlong ai jinghikai (Awareness Program) halor ka Viksit Bharat- Guarantee for Rozgar and Ajeevika Mission (GRAMIN) Bill, 2025 haka jingïalang bala pynlong ha training Hall, ka KVK Jaiñtia Hills, Moopun Wahiajer.
La sdang ïa ka prokram da ka jingkren pdiang burom na Dr. Alethea Dympep, SMS (Agril.Extension) bud sa ka jingkren na ka kong Banylla Kharbamon, ka SMS (Horticulture) kaba la pynpaw shaphang ka aiñ ba thymmai jong ka ri India halor ka MGNREGA da ka jingthmu ban kyntiew bad pynjlan ïa ka kam 100 sngi sha ka 125 sngi na ka bynta ki kam pynroi bapher bapher ha ki thaiñ nongkyndong.
Ka kong R. Lyngdoh, SMS (Agronomy) kala ai jingkren halor ka jingkordor jong ka VB-Gram Bill bad kala batai kumno kane ka kyndon aiñ kan ïarap ban pynïoh kam khambun ha ki thaiñ nongkyndong kaba neh slem katkum ka jingdawa jong ka por.
Naka liang ka kong Dakaniwankishwa Siangshai, kong Welda Lyngdoh bad ka kong Philis Siangshai kila pynpaw halor ki jingïoh myntoi jong ki na ki skhim bapher bapher jong ka Sorkar bad ïa ka VB-GRAM-G Bill. Shuh shuh kila pynpaw ruh halor ki sienjam kiba la shim da ka Sorkar ban ai jingkyrshan ïa ka ïing ka sem jong ki ha ki kam ki jam ba manla ka sngi bad ban pyndap ïa ki jinglut jingsep ha ïing ha sem jong ki.
La pynkut ïa kane ka prokram da ka jingai khublei na Dr. Rimiki Suchiang, SMS (AH&Vety.) bud sa ka jingsam ïa ki kot lyngkdop sha ki nongrep. Baroh kiba la wan ïashim bynta ha kane ka prokram ki don 20 ngut.