Jowai, Naitung, 27: Ka District Legal Services Authority (DLSA), West Jaiñtia Hills District hapoh ka jingkyrshan jong ka National Legal Services Authority (NALSA) ka la pynlong ïa ka jingpynsngewthuh halor ka “NALSA (Legal Services to Persons with Mental Illness and Persons with Intellectual Disabilities) Scheme, 2024” kaba la long ha ka sngi Thohdieng jong ka taiew baladep ha Conference Hall jong ka District and Sessions Court, West Jaiñtia Hills District.
Ka jingthmu jong kane ka prokram ka long kum shi bynta ban pynsngewthuh halor ka koit ka khiah bad ki lad jingïarap sha kiba duna ka bor jingmut jingpyrkhat kaba ki dei hok ban ïoh ka jingkitkhlieh katkum ka kyndon aiñ jong ka sorkar.
Ha kane ka sngi la donlang u Judge H.S Thangkhiew ka High Court uba long ruh u Executive Chairman jong ka Meghalaya SLSA, u District bad Session Judge u N.A Khan kum u Cum Chairman ka District Legal Services Authority, West Jaiñtia Hills, ka District Medical & Health Officer ka Dr. P. Shylla, ki heh ophisar, ki nongïalam shnong, ki muktiar, ki samla pule nalor kiwei de.
U Judge H.S Thangkhiew ula pynsngew halor ka aiñ jong ka ri kaba ïadei bad ka Mental Healthcare Act, 2017 kaba ai ka jingïada ïa ki briew kiba don jingduna ha ka bor pyrkhat, da kaba ong ka jingkyrduh, ka jingngop ha ki jingdih, ka jingbymdon ïa ki ïing ki sem bad ka jingbym ïasngewthuh jingmut ha ïing ka la long ka daw bah jong ka jingsniew.
U N.A Khan ha ka jingkren pdiang ula ai khublei ïa baroh kiba la wan ban ïadonlang ha kane ka prokram na ka bynta ban ai jingtip ïa ki nongshong shnong halor ki kyndon aiñ bad ki lad jingsumar ïa ka koit ka khiah jong ki. Shuh shuh ula pynsngew halor ka jingdonkam jong ka NALSA scheme kaba ai jingïarap sha baroh kiba shah ktah ha bor pyrkhat.
Ula ong kane ka skim ka bthah ïa ka District Legal Service Authorities (DLSAs) ban pynshisha ïa ki briew kiba dei hok ban ïoh ïa ka khamtam ïa kito ki briew kiba don ha ki along, ha ki jaka sumar bad ha ki jaka ri khunswet.
La ai jinghikai ruh ha kane ka sngi ha kiba bun ki bynta kiba ïadei bad ka jingkoit jingkhiah bad ki lad jingïarap kiba lah ban ïoh na ka sorkar jylla bad na ka district ruh kumjuh.
Ki riew shemphang kiba la ai jingïakren ki kynthup ïa ka Senior Residence Psychiatrist ka Department of Psychiatry, NEIGRIHMS, Dr. Dazelle Sungoh, ka Clinical Psychologist Department of Psychiatry, NEIGRIHMS ka Kimberly Syiem, District Mental and Health Programme Officer, Jowai Dr. E. Dann bad ka District Social Welfare Officer, Jowai ka Kong Y. Najiar.
