Shillong, Jylliew, 17: Ka Health Committee jong ka Balang Presbyterian Nongthymmai, Shillong ryngkat ka jingïatrei lang bad ka Seng Kynthei Lumbasuk – A Unite bad ka Dorbar Shnong Lawjynriew, ha ka 17 tarik, Jylliew 2023, ki la pynlong da ka jingïalang ban pynsngewthuh paidbah halor ka jingsniew jong u Drug uba ktah ym tang ïa ka koit ka khiah jong kito kiba la im kyrni hynrei uba ktah ruh wat ïa ka imlang sahlang na ka jingkynrei pat ki kam runar ruser kiba har rukom bad uba long ruh u jingdih pynbuaid uba dkhat wat ïa ka jingim briew.
Nalor ka jingpynsngewthuh halor ka jingsniew jong une u jingdih pynbuaid uba sniew, ha kane ka jingïalang la pynsngewthuh ruh halor ka Ain kaba pyrkhing ban die bad ka jingshah pynshitom ha ka Ain da kaba set byndi ïa kiba don kti ban khaii ïa u Drug.
Ha kane ka jingïalang ki riew shemphang kiba la ai jingkren, ki kynthup ïa ka Keshav Lamsai na ka KRIPA Foundation, u Additional Superintenden of Police, Law and Order ka East Khasi Hills District u Bah SS Dkhar, ka Dr. Valencia Myrboh, u Pastor uba khmih ïa ka Balang Presbyterian Nongthymmai u Rev. NB Diengdoh, u Rangbah Shnong jong ka shnong Lawjynriew u Bah SB Kharshandi bad kiwei kiwei.
