Pynsngewthuh ka AJMW&LU shapang ki skim jong ki nongtrei bylla sngi, kyntu ban shim kabu

Jowai, Naitung 24: Ka All Jaiñtia Muster Roll Worker & Labour Union (AJMRW&LU) ha ryngkat ka All Jaiñtia Midday Meal Worker Union AJMMWU) ha kane ka sngi saitjaiñ kala pynlong ïaka prokram jong ka halor ka phang kaba ong “Lehbha katni, u Kune i, Ya Ka Mynstep: Ioh ka Mynrried u Chngain, Patein u Kyllep u Sdep”.
Ïa kane ka jingïalang la pynlong ha ki ar jaka kata ha Dorbar Hall jong ka shnong Nartiang Pohshnong bad ha Dorbar Hall jong ka shnong Dulong, Jowai bad kane ka long shi bynta ban ai jingtip sha baroh ki nongtrei bylla sngi shaphang ki lad jingïarap kiba lah ban ïoh na ka sorkar lyngba ka tnad Labour jong ka jylla.
Ki nongtrei bylla sngi naduh ki Muster Roll, ki nongshet ja sngi, ki Asha, ki Aganwadi, ki nongtrei misteri ïing, ki nongkhar shyiap, tih maw, shoh mawria bad kiwei de kiba im ja kpoh na ka kam bylla sngi kila wan poi sha kane ka prokram ban ïoh jingtip khambniah.
Ka kong Bethcy Merry Toi, Labour Inspector West Jaiñtia Hills District kala ai jingbatai bnai sha phang ki skim bapher bapher jong ka sorkar kiba kynthup ïa ka e-Shram, ha kaba ki nongbylla sngi ki lah ban ïoh jingïarap lada wan kino kino ki nymsniew ha ki sngi ban wan. Ha ka juh ka por kin ïoh jingïarap ruh haduh 2 lak tyngka lada khlad noh na kino kino ki jingjia aksiden.
Kane ka skim kan ai jingïarap ruh kum bai bam tymmen khang ba yn shngaiñ ka jingim ha ka jinglong tymmen, ban ïoh ïa kane ka skim ki nongïoh myntoi ki hap ban pynrung kyrteng ïalade hapoh ka e-Shram.
Kala batia ruh shaphang ka skim Pradhan Mantri Shram Yogi Maan-dhan (PM-SYM) kaba lah ban ai jingïarap sha ki nongïoh myntoi kum ka bai bam tymmen kaba long haduh 3 hajar tyngka shibnai.
U ma Khroo Lamsalanki Pariat, Adviser AJMW&LU & AJMDMWU haba ai jingkren uba kyntu jur ïa baroh ki nongtrei bylla sngi ba kin shim ïa kane ka kabu bala ai da ka sorkar khlem da pynleh nohei ïa ka namar ka long ka jingmyntoi na ka bynta ka lawei jong ka jingim.
U kyntu ruh ïa baroh ki nongtrei bylla ba kin leit pynrung kyrteng noh mar mar hapoh ka e-Shram lyngba ki cyber kiba don hajan, “kan sa poi ka por ba ka sorkar kan ïthuh bad ai jingïarap tang ïa kito kiba la dep pynrung kyrteng lypa” ula ong.
Hapoh ka West Jaiñtia Hills ka sorkar kala ai jingïarap ïa ki longkmie kiba dei ki nongbylla sngi da kaba pynïoh da ka tyndong shet jingshet bad na ka liang u ma Pariat ula kyntu jur ïa ki longkmie ka District ban shim ïa kane ka kabu, ula pynsngew ruh ka don ruh ka skim shna ïing haduh saw kamra ïa kiba duk hynrei hapoh ka jylla kam shem la pyntreikam bha ïa kane ka skim ba wan na ka sorkar kmie.
Shuh shuh ula ïathuh na ka liang ka sorkar kala pyrshang ban pyntrei ïa ka ‘One Nation One Ration Card’ ha kaba ki nongbylla ki lah ban leit trei na kawei ka jylla sha kawei pat bad lada ki don ha kano kano ka jaka kin ïoh beit ïa ki lad jingïarap na ka sorkar.
Ha kane ka sngi la don ruh ka jingpule ïa ka Soskular (Pledge) ban leh ïa ki kam ba bah bala ïalam da u Dapherborn N.Suchiang, General Secretary, AJMW&LU-CEC.