Pynsngewthuh ka AH&Vety. ïa ki paidbah ka thaiñ Shngimawleiñ ban kyntiew ïa ka kam ri jingri

Mawkyrwat, Nohprah, 15: Kum shibynta ban pynsngewthuh ha ki paidbah jong ka dong ka thaiñ halor kumno ban ïada ïa ki jingri jingdup na ki jingpang ba bun jait, ka ophis Animal Husbandry & Veterinary Department (AH&VD), South West Khasi Hills District mynta ka sngi ka la ïoh ban pynlong ïa kawei ki prokram ai jinghikai ne ka awareness programme ha kaba ha kane ka sngi la wan ban ïashimbynta da ki 300 ngut ei ei ki paidbah na ki 7 tylli ki shnong jong ka thaiñ Shngimawleiñ, South West Khasi Hills District.
Ïa kane ka prokram la pynlong ha phyllaw jong ka Shngimawleiñ Government Upper Primary School ha kaba u kongsan u dei u bah Polin Lyngdoh Marshillong, Headmaster jong ka Shngimawleiñ Government Upper Primary School ha ryngkat ka jingïadonlang ki doktor napoh ka ophis jong ka Animal Husbandry & Veterinary Department (AH&VD), South West Khasi Hills District, bad ki longkmie longkpa kiba long ki nongïashimbynta ha kane ka sngi.
U bah Polin Lyngdoh Marshillong kum u kongsan haba kren ha ka jingïalang u la pynpaw ka jingaikhublei ïa ka ophis jong u District Animal Husbandry & Veterinary Department uba la shim ïa kane ka synjam ban pynlong ïa kum kine ki jait prokram kiba long ka jingmyntoi na ka bynta ki paidbah nongshong shnong kiba ju im sngi ha kaba ri jingri naduh ki masi, ki sniang, ki blang bad kiwei. U la ong ruh ba lyngba kane ka prokram kiba bun ki nongshong shnong kin sa ïoh ki jingmyntoi lyngba ka jingai jinghikai jong ki doktor.
Namarkata, u la kyntu ïa ki paidbah nongri jingri ba haba ki la ïoh jinghikai kim dei ban pynleh noh ei hynrei ki dei ban pyndonkam hok ha ka ban pynïaid shaphrang ïa ka kam khnang ba ki jingri jingdup jong ki kin heh kin san bad ki lait na shibun ki jait jingpang kaba long ka daw jong ka jingpoi haduh u pud jong ka jingïap.
Ha kane ka sngi la ïoh ruh ki jinghikai bad ki jingai jingpynshai na ki doktor kata na ka Dr. I. Wanniang, kaba la kren shaphang ki jait jingpang bad ka jingsumar ïa ki jingri jingdu bad kumno ban leh lada ki nongri jingri kim don ha ka met ba koit ba khiah bad kumjuh ruh kaba kham kongsan ka long ban ïoh ïa ka doh bad ka dud kaba khuid na ki jingri. Katba ka Dr. F.L. Lyngkhei pat kaba la kren halor ka jindonkam jong ka jingaidawai wieh, ka jingaitika bad ka jingregister lyngba ka ‘Ear tagging’.
Kumta, na ka liang jong ki nongai jinghikai ha shwa kaba kut jong ka jingialang ki la kyntu bad ai mynsiem ïa ki nongri jingri ba ka jinglehkhuid bad ka jingai jingtip ha ka por kaba biang ïa ka jinglong jingman jong ki jingri yn lah ban ïada na ka jingïap jong ki.
Ïa ka jingïalang ha kane ka sngi la pynïaid da u Dr. B.K. Mawthoh, District Animal Husbandry & Veterinary Officer, South West Khasi Hills District ,La ioh ruh ia ka jingkren lyngkot na u Myntri jong ka Shnong Pyndenmawthawïang, u bah Homly Lyngdoh bad ka jingkren khublei na u Dr. W. Lyting, Animal Husbandry & Veterinary Officer, South West Khasi Hills District.
La pynshit pynshngaiñ ïa kane ka prokram da ka jingrwai na u bah Moris Lyngdoh Marshillong.