Tura, Nailur, 01: U Deputy Chief Executive Member (Dy.CEM) ka Garo Hills Autonomous District Council (GHADC) u Nikman Ch.Marak u la aiti da ka jingthoh ha u Symbud Myntri Rangbah ka Jylla u Bah Prestone Tyngsong uba peit ruh ïa ka tnat sam bording ha kaba ïadei bad ka jingsahteng ka jingpynpoi bording sha ki 20 tylli ki shnong kiba hap hapoh ka Chokpot bad ban dawa ruh ba dei ban thung da ka jingtohkit halor ka jingkynnoh bamsap kaba poi haduh u pud ban iehnoh shiteng ïa ka jingring bording sha kine ki shnong.
Ha ka jingthoh, u Dy. CEM u la kdew ba ki 20 tylli k shnong kiba hap hapoh ka Chokpot Civil Sub Division jong ka South Garo Hills, ki kynthup ïa ka Daji A•dugre, Daji Boldakgre, Daji Rongkuakgre, Rongbinggre, Waro Songgitchamgre, Minchi Chiringgre, Ka•ma Minchi Chiringgre, Waro Songgital, Waro Songgitcham, Bugakolgre, Sangma Matchok, Nokwatgre, Ganggugre, Kalbanggre, Rongmigre, Nekalpagre, Rongrugre, Chiringmagre bad ka Rongasigre ha kaba ïadei bad ka jingsahteng ka jingpynpoi ïa ka bording sha kine ki shnong.
Shuh shuh u la ong, ba ka jingthmu ban pynpoi ïa ka bording sha kine ki shnong la pynsdang naduh u snem 2010, hynrei na ki daw ki bym lah satia ban tip, ïa ka kam la shu pynsangeh la 12 snem kynthih.
U la kyrpad ïa u Myntri, ba un shimkhia lem halor kane ka jingeh jong ki paidbah jong kine ki 20 tylli ki shnong.
“Nga kyrpad ban pynstet noh mardor ïa ka jingtain bording sha kine ki shnong bad ban thung ïa ka jingtohkit halor ka jingpynslem ban pynpoi ïa ka bording sha kine ki shnong khnang ba ki Ophisar bad ki Kontraktor kiba donkti kin shah pynshitom,” la bynrap u Marak.
