Pynsngew ki nongrep Lapangap ha ka KSU ba ym ïoh leit peit ïa ki marrep ba pynthut ki Karbi

Shillong, Naitung 28: Ka KSU hadien ba ka la ïoh ban ïa kynduh bad ki nongshong shnong ka thaiñ Lapangap bad ki nongrep ha ka 25 tarik Naitung 2025 ki lah pynpaw ïa ka jingeh hakhmat u President Rangbah ka Seng KSU u Samla Lambokstarwell Marngar halor ka jingbym ïoh shuh ka jong ki ban leit peit ïa u kba ne wat ban sumar ïa ki jingrep ki jong ki namar ka jingpynthut ki briew Karbi bad ki pulit Assam na ka por sha ka por.
Kane ka jingpynthut ka la jia ruh ha ka 27 tarik u Naitung ha kaba ki runar na ka liang ki Karbi ki la siat da ki knah ne ki jri siat bad wat da u khnam da ka jingthmu ban pynmynsaw bad pynïap ruh sha ka liang ba don ki ïing ki sem bad ki hali ki pynthor jong ki Khasi.
Ka seng marsien ïoh ïa kane ka jingtip na ka liang ka shnat treikam ka seng ka KSU West Jaiñtia Hills District Unit ha ka jingsynran ryngkat ki nongkhmih khmat jong katei ka tnat treikam kiba kynthup ïa u samla Pynkmen Sanmiet, Samla Shiningstar Kharbihkhiew bad Samla Sonstar Nongkhlaw ha ka sngi Nyngkong ki lah ïoh ban ïa kynduh ïa u Superintendent of Police ka West Jaiñtia Hills District da kaba ai ka dorkhas ban buh noh syndon ïa ka kynhun pulit ki ban peitngor bad ïada ïa ki Khasi kiba don ha ka shnong Lapangap khnang ba kan long ka jingshngaiñ jong ki nongshong shnong katei ka shnong namar haduh mynta ka dang don beit ka jingshong syier ha katei ka shnong bad ka thaiñ khappud na ka jingmaham bad byrngem byrsit ki runar Karbi.
Ka seng kan ïai don ryngkat syndah bad ki paid ka shnong Lapangap bad ka kyntu jur ïa ka sorkar ban kham pyneh ïa la u budlum ban pynbeit ïa kane ka kam khnang ban long ka jingshngain? ïa ki paradoh para snam ba shong ha kitei ki thaiñ.