Nongstoiñ, Naitung, 16: La khyndai snem kynthih ka sorkar ka la buh ïa ka ktem pulit ha Langpih, hynrei haduh mynta katei ka ktem pulit ka dang duna nadong shadong kata naduh ka jaka sah, ka kamra trei kam, ka jaka set ïa kino kino kiba shah kem bad wat ha ka jingdon jong ki pulit naduh ki constable (AB) (UB) haduh kiba kham heh ruh ka dang tlot haduh katta katta.
Watla katta ruh ka jingdon ki pulit Meghalaya ha ka thaiñ Langpih, ka jinglong jingman ha katei ka thaiñ khamtam ha kine ki khyndiat snem, kum ki huri hura bad ki jingshah thombor ba khah khah ha ki pulit Assam bad ki Nepali ka la duna.
Hynrei, namar ba katei ka thaiñ ka dang don ha ka jingbym pat lah ban ïa pynbeit hapdeng ka Assam bad Meghalaya bad ruh na ka jingbun jong ki Nepali kiba wan rung thymmai, kumta ka dang buh ïa ki paidbah nongshong shnong Khasi ha ka jingbym shngaiñ.
Kumta, halor katei ka nongrim ki paidbah ka thaiñ naduh ki nongïalam shnong, ki Seng samla bad ki longkmie, ki da angnud eh ba ka sorkar kan pynbun shuh shuh ki pulit bad ban pynsted katba lah ban sdang noh ïa ka jingtei ïa ka Out Post ba pura.
Ha kaba ïa dei pat bad ka Sub Health Centre kaba ki paidbah ki dawa baroh shikatta, na ka liang ka sorkar ka la dep mang tyngka kumba sanphew hynriew lak sanphew phra hajar tyngka bad ka jingpynkhreh ka la ïaid shakhmat halor kane ka bynta, kata katkum ka sanction order No.Health/73/2017/18, Shillong la dep mang ha ka 31 tarik Lber 2021 bad la dep pynbna tender ha ka 25 tarik Jylliew 2021.
Na ka liang ka FKJGP Langpih kaba ju tur na ka por sha ka por halor kane ka bynta, ka la leit ban ïakynduh kyrpang ia ka District Medical &Health Officer (DM&HO) ban shim khia bad ban pynsted noh ban tei ïa katei ka Health Sub-Centre ym tang ban pynbna tang ha ki paper.
Ki nongialam ka seng ki la pynpaw ba kin kan iai dawa, khnang ba ki paidbah jong ka dong bad ka thain kin ioh jingmyntoi kumba ioh lem kiwei ki nongshong shnong kiba don ha ka jylla. Na ka liang ka DM&HO Nongstoin ka la kular ha ki nongialam ka seng ba kan shimkhia ban pyn urlong ia katei ka Health sub centre kum ba la pynbna ka sorkar Jylla bad kumba la angnud ki paidbah ba sah ha ka thaiñ khappud Langpih.
