Jowai, Lber 28: U Dolloi ka Elaka Jowai ma Puramon Kynjing ha kane ka sngi saitjaiñ 26 tarik u Lber, ula pynskhem ïa kawei ka shnong thymmai ïa kaba seng ha ka kyrteng ka ‘Myntdu’ bad kaba dang hap hapoh u pud u sam jong ka Elaka Jowai.
Kane ka shnong ka don ha Jingkieng Myntdu surok ba leit na Jowai sha Shillong, haduh mynta ka don 35 tylli ki longïing bad ïa u pud sawdong ka long na mihsngi– Dorbar Shnong Caroline, Sepngi– Wah Mynkrem, Shatei– Liar Kam Kam bad Shathie– Dorbar Shnong Iawmusiang.
Kitei ki nongshong shnong naduh ki longkmie, ki longkpa, ki khun samla jong ka bad kumjuh kiba don jaka hapoh katei ka shnong thymmai kila shim ïa ka jingmynjur lang ha kane ka sngi ban pdiang da kawei ka jingmut ïa kane ka shnong ha ka kyrteng ka Myntdu ha kane ka jingïalang paidbah ba la khot da u Dolloi ka Elaka Jowai ha ïing ka kong Simple June Pakynteiñ.
Uwei u Rangbah ba don jaka hapoh u pud u ang jong katei ka shnong thymmai ula ong katkum ki kyndon jong ka JHADC la batai shai, ban seng shnong kam dei ban duna ïa ka 20 tylli ki longïing bad 50 ngut kiba la heh ka rta kata 18 snem shaneng. Kumta ka donkam ban mih ki shnong khnang ban wanrah ïa ka roi ka par bad kyrmen ba kane ka shnong thymmai ka long ka nuska ïa kiwei.
Hadien ka jingïamonjur lang u Dolloi ka Elaka Jowai ma Puramon Kynjing ula shim ïa ka rai ba la pdiang ïa kane ka Shnong Myntdu katkum ki riti pynïaid kam jong ka JHADC ula pyntip ïa ki kam kiba ïadei bad kane ka shnong yn phah noh sha ka District Council ban leh ïa kaba donkam.
U Dolloi u kyrmen lyngba ka jingdon jong kane ka shnong kan wanrah ïa ka bha ka miat bad ka roi ka par, ula kyntu ha ka jingshynshar shnong kam dei ban don kano kano ka jingleh shilliang khnang ba ka shnong kan dang kiew shaphrang ha baroh ki liang.
