Jowai, Nailur 12: Ka Dorbar Dong jong ka Salini Colony Mihmyntdu hynnin ka sngi 10 tarik u Nailar ka la ïoh ban pynskhem ïa ki nongkitkam ba thymmai jong ka ha Community Hall jong ka Dong. Ha shwa kane ka jingpynskhem kular ïa ki nongkitkam ba thymmai la don ka jingïalang ka ba la pynïaid da u ma T. Sawian.
Ki khun samla jong ka dong ki la ai ka jingrwai ba sngewtynnat kum ka jingrwai pdiang burom ïa ki paidbah nongshong shnong bad ïa ki nongwan baroh.
U ma Abul Phawa ha ba ai jingkren ha kane ka sngi kum u Kongsan ula ong ba ka shongsuk shongsaiñ ka shnong ka thaw ka long ka ba donkam eh haduh katta katta khnang ban wan rah ïa la roi ka par hapoh shnong pohthaw. U Ma Brightstar Chyrmang MDC jong ka JHADC ha ba kren ha kane ka sngi u la ïaroh ïa ka Dorbar Dong kaba lah ban kyntiew ïa ka shnong ka thaw bad ula ong “ngi donkam ïa ka jingïatreilang khnang ban ïoh ïa ka roi ka par ha ki liang baroh”.
U Ma Octomewot Lamin Nominated MDC ka JHADC ha ba ai jingkren u a ong ba kum ka shnong ka donkam ban ïatylli ban ïa burom kylliang iwei ïa iwei pat khnang ban wan rah ïa ka roi ka par ngi donkam ban shakri mar kylliang para briew. U Ma D Kyndiah haba pule ïa ka history jong ka Dong u la ïaroh ïa ki nong seng ïa kane ka dong, kiba trei shitom met bad mynsiem haduh ba ka dong ka la kiew ha ki liang baroh. Shuh shuh la pynphuh pynphieng ïa kane ka sngi da ka jingrwai bad jingshad na ka Kynhun SHI IUNG, kumjuh na ki seng Manbei kiba ai ka jingshad pliang, ki drama lyngkot, ki Fancy Dress bad ki wei kiwei de. Ïa ki kyntien ai khublei la ïoh na u ma W Pohthmi.
