Khliehriat, Iaiong 14: Kaseng Hynñiewtrep Youth Development Council (HYDC) ha ka 12 tarik Ïaiong kala ioh ban pynskhem ïa ki nongkitkam jong ka East Jaiñtia Hills District ha ka jingiadon lang u president rangbah ka seng u Bah Wyraiwan Sohtun, General Secretary ka CEC bah Shaniahlang Suchen bad kiwei kiwei ki dkhot ka CEC.
Ha Kane ka jingpynkshem ïa ki dkhot ka EJHD la ioh ruh ïa ka jingkren na u General Secretary ka CEC bah Shaniahlang Suchen, u Wyraiwan Sohtun President ka HYDC Central Body u la ong ba ki samla jong ka district ki dei ban iatylli lang ha kaba ïadei bad ka bhah kam bhah jam ha ka district ka jong ki lyngba ki kompeni shimet.
U la ong ruh ba bun na ki petrol pump bad dukan heh kiba don ha ka district kim shym la pyntreikam satia ïa ka minimum wage 2024, kaba la pynlong aiñ da ka sorkar Meghalaya kaba dei kawei ka lad jingmyntoi jong ki khun samla .
U la ong shuh shuh ba ka lad kamai kajih hapoh ka district la bun ba la kurup lut ki briew ba nabar naduh ki dukan rit haduh ki dukan heh kumjuh. U la ong ba ka dei ka kamram jong ki samla ban leit sha ka sorkar ban kyrsiew thiah na ka bynta ban weng ïa ki jingeh ki samla wadkam bad na ka bynta kito ki ba kwah ban seng ïa ki kam ki jam lajong.
Nalor kata u la bynta ba ka jingioh mon jong ki karkhana pynmih dewbilat ban trei laitlan hapoh ka district kala pynlong ïa ki samla bad ki longïing ban duh noh ïa ki kam khaïi pateng ki jong ki lyngba ki kali na ka bynta ban pynkit dewbilat.
Ka jingiohlad ki karkhana pynmih dewbilat ban thied kali katba mon ka pyni shai kdar ba ka sorkar kala ai lad ïa kine ki kompeni ba kin leh trei laitlan katba ki mon. Ha kaba ïadei bad ka iohkam iohjam ha ki karkhana dewbilat ka seng ka la ong ba kan sa pynlong ïa ka jingïalang paidbah ha Khliehriat ban pynsngewthuh sha ki paidbah ïa ka aiñ MIIP 2024( Meghalaya Industrial investment policy 2024) kaba lah ban iarap ha ka liang ka iohkam ioh jam hapdeng ki khun samla.
Ha kane ka sngi la pynskhem bad pynban smai ïa ki dkhot ka seng da u president bah Wyraiwan Sohtun. Ki nong kit kam ka HYDC-EJH ki kynthup ia u President Bah Hasraelmi Ryngkhlem, V President Jantis Dkhar, General Secretary Wing Shyrmang, Asstt Genl Secy Monkini Shylla, Finance Secretary Lambok Dkhar, Sports Secy N.Pyrtuh, Office Secretary R. Lyngdoh, Working president M. Laloo, Joint Secy P Khappiah, Asstt & Cultural Secy P. Phawa, Publicity L Rymbai kynthup ia san ngut ki dkhot.
