Shillong, Lber 31 : Ka Voice of the People Party (VPP) mynta ka sngi ka la pynskhem ïa ka kyrteng jong u Dr Batskhem Myrboh kum u kyrtong jongka na ka bynta ka Bye Election MP Lok Sabha na kane ka Shillong Parliamentary Constituency hadien ka jingkhlad noh u MP u Dr Ricky A.J Syngkon uba dei na ka VPP hi.
ïa kane la pynskhem da ka State Executive Secretary jongka VPP mynta ka sngi ka 31 tarik Lber hadien ba la ïoh ka jingtyrwa na ka State Election Committee.
Ha ka jingpyllait khubor mynta ka sngi u Nongpathai khubor ka VPP u Dr Londoner Murphy Sohtun ula ïathuh ïa kane ka rai la mynjur hadien ba la bishar bad ïatai sani bha da ki Nongïalam ka Party.
U Dr Sohtun u la ïathuh ba ïa u Dr Myrboh la jied kum u kyrtong namar u dei uwei na ki Nongïalam uba aiti na ka bynta ka Party uba ïeng ruh ha ka nongrim jongka party bad ban shakri hok ïa ki paidbah. Nalor kane u don ruh ka sap kum u nongïalam bad uba kloi ban aiti na ka bynta ka bha ka miat ki paidbah.
Ka VPP ka kyntu ïa ki dkhot bad ki nongkyrshan jongka ban ïeng tylli na ka bynta une u kyrtong jongka.
“ Ka party ka khot bad ïawer ïa baroh ki dkhot bad ki nongkyrshan jongka ban ai ka jingkyrshan ba pura khnang ba u Dr Batskhem un ïoh ïa ka jingjop ha kane ka bye election” pynkut u Dr Sohtun.
