Pynskhem ka jylla ïalade ba ka la kiew ka rep ka riang khlem pyndonkam dawai ha ka WFI

Shillong, Nailur 26: Ka jylla Meghalaya ka la pynskhem ïalade kum ka jylla kaba la kiew bha ha ka rep ka riang ha ka World Food India (WFI) 2025, ha kaba kane ka long ka dak kaba kongsan ka jingïaid lynti ban thung ïa ki mar rep kiba khlem ai dawai.
Ka jingleit shim bynta ka jylla kum ka Focused State ha kane ka prokram kaba kyrpang, kaba la plie da u Myntri Rangbahduh ka ri u Narendra Modi ha Bharat Mandapam, ka la pynpaw ïa ka jingkiew ka kam rep khlem dawai kaba la khring ïa kiba bun ha kane ka prokram.
Ha ka prokram, U Myntri ka Sorkar pdeng ba khmih ïa ka tnat Food Processing Industries, u Chirag Paswan, ha ryngkatlang bad u Myntri Rangbah ka jylla u Conrad K Sangma, ki la plie ïa ka Meghalaya Pavilion, kaba pyni ïa ka jingangnud ka jylla ban thung ïa ki mar rep da kaba khlem pyndonkam dawai.
Ha kane ka jingpyni paidbah ïa ki buit ba shem thymmai ïa ka rukom rep, ka jingïasam ha ka ïoh ka kot kaba long naduh tynrai, bad ka jingshalan ïa ki mar rep kaba khlaiñ lyngba ki lad jingtei, ka pyni ba ka Meghalaya ka don ka lad ban kynjoh sha ka thong ban pyndap ïalade ha ki mar rep bad kaba ïaid lang ruh bad ki jingïakob ha ka pyrthei.
U Paswan u la ïaroh ïa ka jingkiew shaphrang ka jylla, da kaba kdew ba ka sorkar kan ïaibteng ban kyrshan ïa ka Meghalaya halor kane ka jingsdang ka rep ka riang khlem dawai.
“U Shynrai Lakadong na Meghalaya u la ïoh ka jingithuh ha ka pyrthei, ha kaba kane ka pynphalang ïa ka jinglah ka jylla ban khring ïa ka ïew halor kine ki mar rep ba khlem ai dawai,” u la ong.
Katba u Myntri Rangbah u Conrad Sangma, haba banjur ïa ka jingpyrshang ka jylla ban pynkupbor ïa ki nongrep bad kiba sengkam la jong ha ki thaiñ nongkyndong, u la kyntu ïa ki ba kin bat ïa kine ki lad ba la ai kum ki rynsan da ka WFI.
“Ngi pynsuk, hynrei ka jingkylla ka shaniah halor ki jingtrei shitom jong phi,” pynpaw u Sangma, da kaba banjur halor ka jinglong kongsan ki jingpyrshang ki nongshong shnong.
Ka Meghalaya Organic Mission 2024-28 ka thmu ban pynskhem ïa ka jaka kaba 1 lak hectare hapoh u snem 2028, da ka jingpynlut kaba long T. 250 klur. Kumba long mynta, palat 24,000 hectare la dep ban pynskhem ha kaba ka la ai jingmyntoi ïa palat 40,000 ngut ki nongrep. Ka pdeng jong kane ka jingïaid shaphrang ka kam ka dei ka state Community Public Private Partnership (CPPP) model, kaba wanrah ka jingïatreilang hapdeng ki nongrep, ki shnong bad ki nongpynlut kiba dei na ki riew shimet.
Kum shi bynta na kane ka jingsdang, ka jylla ka la plie 8 tylli ki PRIME Hub, ha kaba kane ka la khring ka jingpynlut ka pisa kaba T. 220 klur. Kine ki hub ki kyrshan ïa kumba 15,000 ngut ki nongrep bad kiba la thaw palat 1,500 tylli ki kam. Da u snem 2031-32, ka Meghalaya ka la pyrkhat ban pynïar shaduh ki 55 tylli ki PRIME Hubs, da ka jingmang baroh kaba dei ban pynlut ka long T. 550 klur, ka ban ai jingmyntoi ïa 3.4 lak ngut ki nongrep bad ban pynmih ïa palat 11,000 tylli ki kam.
Ha ka WFI 2025, ka jylla ka wanrah ïa ka “Meghalaya Collectives – Organic” brand ban kyntiew ïa ki mar rep ba khlem khleh dawai, ba kynthup ïa u shynrai Lakadong, u Shynrai Khasi, u Sohïong (blackberry), bad u Kew pineapple.
Kane ka jingplie ka dei ka dak ban kyntiew ïa ka jingshalan mar ka jylla, kyrpang da kaba ïasoi ïa 4 tylli ki MoUs hapdeng ka MEGNOLIA, ka rynsan pynïaid ïew ka jylla bad ka karkhana kaba paw kaba kynthup ka Lulu Group Retail, ka Staple Kaka, Plantrich Agri Tech Pvt Ltd, bad Treta Agro Pvt Ltd. Kine ki jingïatreilang ki thmu ban pynbha ïa ka ïew ha India bad ha ki ïew ki ri Gulf.
Naduh u snem 2022, ka Meghalaya ka la lah ban shalan ïa ki mar rep khlem dawai kum u soh Trun (pineapples), ki soh niamtra (mandarins), bad u sying sha ki ri phang pdeng mihngi (Middle East).
Kham ha shwa une u snem, ka jylla ka la pynkit haduh 15 metric ton u sying ba thung khlem dawai bad kumba 20 metric ton u Sohniamtra GI-tagged sha ki ri Gulf Cooperation Council (GCC), ha kaba kane ka la buh ïa ka kyrdan ki kam shalan ha ki ïew jong ki ri ka pyrthei.
Ha ka World Food India 2025, ha kaba la don palat 2,000 ngut kiba la wan shim bynta ha kane ka jingpyninam na palat 90 tylli ki ri, ka la sakhi kum ka rynsan kaba khlaiñ bor kaba pynpaw ïa ka jinglah ka Meghalaya ban kyntiew ïa ki kam rep.
Katba ka prokram ka dang ïaid, la khmih lynti ba ka jylla kan ïoh ki jingïaroh halor kane ka jinglah ban pynneh ïa ka kam rep kam riang, ong u heh ophisar ka tnat horticulture.