Pynskhem ka BJP ïa ki nongkitkam Kisan Morcha ha Ri-Bhoi, kular ban ïeng skhem na ka bynta ki nongrep
Nongpoh Rymphang 28: Ban pynurlong ïa ka thong pynroi jong u Myntri Rangbahduh ka ri, u Narendra Modi, lyngba ki skhim bapher bapher kiba ka sorkar ka la wanrah na ka bynta ka bha ka miat jong ki paidbah bad khamtam ki nongrep, ka Bharatiya Janata Party (BJP) Meghalaya ryngkat ka State BJP Kisan Morcha mynta ka sngi ka la pynlong ïa ka jingïalang paidbah ban jied bad pynskhem ïa ki nongkitkam jong ka District Kisan Morcha bad ki Mandal Kisan Morcha ha ki san tylli ki Constituency jong ka Ri-Bhoi District.
Ïa kane ka jingïalang la pynlong ha Gladden Tower, Nongpoh, ha kaba la sakhi lang da ki nongïalam ba hakhmat jong ka jylla kiba kynthup ïa u Bah Wankit Pohshna, State Secretary ka BJP, u Bah Duruth Majaw, State President ka Kisan Morcha, u P.S. Toor, General Secretary ka State Kisan Morcha, bad u Bah Donlang Nongbri, State Secretary ka Kisan Morcha, lem bad kiwei pat ki nongïalam ka seng.
Ha ka jingpynskhem ïa ki nongkitkam ka District BJP Kisan Morcha ha Ri-Bhoi, la pynskhem ïa u Bah Jinon Syngkli kum u President, u Bah D. Maring kum u Vice President, u Bah Blanting Namsaw kum u General Secretary bad kiwei.
Nalor kata, la pynskhem ruh ïa ki nongïalam jong ki Mandal Kisan Morcha kiba kynthup ïa u Bah Suni Manih kum u President ka Nongpoh Mandal, u Bah Simon Lapang kum u President ka Jirang Mandal, u Bah Akbar Rongpeit kum u President ka Mawhati Mandal, u Arbistar Kharthangmaw kum u President ka Umsning Mandal bad u Bah Precious Mador kum u President ka Umroi Mandal.
Ha ka jingïalang, ki nongïalam ka BJP ki la pynpaw ruh ïa ka jingkhuslai kaba jur halor ka jingeh kaba ki nongrep ki ïakynduh ha kine ki sngi, kynthup ïa ka jingkiew dor ki mar rep, ka jingbym biang ka ïew ka hat, ka jingduna ha ka jingioh jingïarap pisa bad ki lad jingïarap na ka bynta ki mar rep. Ki la ong ba ka BJP ka angnud ban ïai bteng ban ïakhun na ka bynta ka hok jong ki nongrep, ban pynkhlaiñ ïa ki jingïarap lyngba ki skhim sorkar bad ban wanrah shuh shuh ki lad kamai kiba pynneh pynsah ïa ka jingim ki nongrep ha ki thaiñ nongkyndong jong ka jylla.