Shillong, Jylliew 15: Ka tnat Music, ka Martin Luther Christian University, Shillong sa shisien pat ka la kiew ha ka rynsan ban pynshongshit ïa ka shnong Wahingdoh ha kaba ki samla pule jong ka jong ka 9th edition ki la pynlong ïa ka concert ban rwai bad pyni ïa ki sap tem jong ki ha ka “Ha Kylli ki Khriang” kaba dei ka concert kaba shisien shisnem jong ka tnat ha ka 13 tarik mynta u bnai ha Wahingdoh Community Hall.
Ïa kane ka kyrteng kaba la pynkylla sha ka phareng ka “Circle of Rhythms” ka la pynphalang ïa ki jinghiar pateng ka riti dustur jong ki mynbarim khamtam ha kaba ïadei bad ka jingshad tynrai ki Khasi, kaba long ka dak ka jingïalong kawei bad ka jingsngew shipara lyngba ka put ka tem (music).
Kane ka concert ka ai ruh ka jingmyntoi ïa ki samla ban ïoh kiew ha ki rynsan ban pyni ïa ki jinglah jong ki ban tem bad rwai ha kiba bun ki kyntien, ki jingkren, ka put ka tem tynrai, ka folk fusion bad kiwei kiwei.
Kane ka jingïoh lad jong ki ban mad ïa kane ka jingpyni jong ki ïa ki sap ki phong la ai mynsiem bad pynshlur ruh da ki nongtem ba pawnam na Shillong kiba la ai ruh ïa ki jingkynthoh bad kumjuh ruh kiba la pyni ïa ki buit bad ki sap kiba lah ban kyntiew ïa ka jingim jong ki samla pule.
Ha kane ka concert ki la don ruh ki paidbah bad ki nongsngap kiba la pynpaw ïa ki jingsngewkmen haba ki ïoh ban shim bynta ha kane ka prorkam kaba la pynlong ruh ïa ki ban pynkhih ïa la ki jong ki met ki phad ïa ki jingput jingtem ba la leh da ki samla pule kaba la pynlong ruh ïa ki ban don ka jingsngew shipara.
La ong ba kane ka concert ka la long shisha kaba pynsah jingkynmaw bad kaba la wanrah ka jingkmen bad ka jingsngew tynnat haba ïadei bad ka put ka tem.
