Jowai, Naiwieng 17: Ka National People’s’ Youth Front (NPYF) Tyrshang Unit ha kane ka 15 tarik u Naiwieng kala ïoh ban shna pynbha pynmiat ïaka surok shnong, khnang ban pynsuk ïaka leit ka wan bad ka kit ka bah jong ki paidbah khamtam eh ïa ki nongrep ka thaiñ.
La pynbha pynmiat ïa katei ka surok ha ki bynta ba sniew eh da kaba pyndonkam ïa ka JCB bad ki mohkhiew bad ïa kane la kyrshan borbah ïa ka NPYF Tyrshang Unit da u MLA ka thaiñ uba dei u Symbud Myntri Rangbah ka sorkar jylla u ma Sniawbhalang Dhar.
Halor kane ka NPYF Tyrshang Unit kala ai khublei kyrpang ïa u MLA ka 1-Nartiang ula la kloi ban ïarap ïa kane ka jingkyrpad ka Unit ban pynbha pynmiat ïa ka surok ban ïoh jingmyntoi kiba bun ba lang.
Ha katei ka sngi ba pyndep ïaka jingpynshna surok la ïalam khmat da u President ka NPYF Tyrshang Unit u Walmijune Syngkon, u Secretary samla Damian Pynrope lem bad ki dkhot Member ka Unit ha ryngkat ki Adviser kiba la wan ban ai mynsiem lang.
