Mawkyrwat, Nohprah, 21: Ka kynhun nongñiah ar shaka jong ka jylla Meghalaya ba la tip kum ka ‘The Ultimate legend Bikers Association’ (TULBA) ha ka 20 tarik u Nohprah, 2020 ki la ïoh ban aiti noh ïa ka ïing ba la pynshna hi da ka seng sha ka kong Tiewlindaris Thongni kaba dei ka long iing ba duk ha shnong Mawthawiang Nongtraw South west Khasi Hills District
Na ka liang ka TULBA ha shwa ba kin aiti ïa kane ka ïing sha ka kong Tiewlindaris Thongni bad 4 ngut ki khun ki la ïoh ban pyn long ka jingïalang ba lyngkot ban pynshai ïa ki mat trei kam jong ka seng bad ruh ka jingduwai kyrkhu pynkyntang da u Pastor S.N. Wahlang bad ha dien ka ta ki la ïoh ruh ban ot ïa u ribon bad ruh ka jingot ïa u cake kum ka dak ka jinglehkmen khrismas bad kane ka iing khunswet ha ryngkat lang bad ki dkhot jong ka TULBA bad ki paidbah kiba la wan sakhi lang ha kane ka sngi.
U bah Odicios Shullai, Vice President, TULBA Central Body haba kren ha ka jingïalang u la pynshai khyndiat ha kaba ïa dei ka jingïaid lynti bad ka jingthmu ba kongsan tam jong kane ka kynhun nongñiah ar shaka ba naduh ba sdang ban seng ïa kane ka dei na ka bynta ban ïa noh synñiang ïa u duk u kup shilliang bad kiba shem jingeh bad ki jingkyrduh. Ula ong ruh ba ym tang katta, kane ka seng ka ai ruh ka jinghikai ne ban rat dyngkhong ïa ki jingsniew kum ïa kiba la kyrni ha ka bam ka dih bad ruh ban hikai ïa ka akor bad ka burom.
“Wat sngew ba phi long kiba duk tam hynrei shibun kiba kham jynjar palat ban ïa phi U Blei U ïohi bad Un phah ïa kiba leh i-synei ïa phi”, ong u bah Odicios Shullai. Namarkata, u la ai ka kyntien kyrkhu kyrdoh ïa ka trai ïing ka kong Tiewlindaris Thongni bad ïa ki saw ngut ki khun ba kin shimti ïa kane ka ïing ba ki la pynshna na ka bynta jongki ban kin ïa imsuk imsaiñ bad kin ïa koid ïa khiah da kaba kynmaw ruh ïa u Blei Nongbuh Nongthaw.
Ha kane ka sngi la ïoh ruh ka jingkren na u bah Kyrshanlang Nongbri, President TULBA Sohryngkham, u bah Karnatik Lyngdoh Tongkhar, President TULBA Mawkyrwat Unit bad ka jingkren sngewnguh na u Secretary shnong Mawthawïang-Nongtraw bad ka jingkren sngewnguh na ka trai ïing ka kong Tiewlindaris Thongni.
La pynshit pynshngaiñ shuh shuh ïa kane ka sngi da ka jingïadonlang ki nongïalam ba hakhmat jong ka kynhun nongñiah ar shaka ka TULBA Central Body bad ki dkhot jong ki Unit bapher bapher na kylleng ki distrik hapoh ka jylla Meghalaya ki ‘riew rangbah, kiba ha ïing ha sem jong kane ka longïing bad ki paidbah jong kane ka shnong Mawthawïang-Nongtraw.
Ïa ka jingïalang la pynïaid da u bah Rishan Nongrum, General Secretary TULBA Central Body.
