Nongpoh Ïaiong 01: Ka long ka khubor ba bha bad ka jingkmen ïa kawei ka longiing ba duk tasam haka shnong Myrdon kaba shem jingeh wat tang ban shna ïaka iing sah pynban da ka mynsiem ba kyluid jong ki nongïalam ka FKJGP Myrdon Circle katei ka longiing da ka jingkmen kala ioh pat ïaka ing ban shong ban sah hadien ba ka seng kala pynshna da ka iing.
Katei ka longiing kaba la mad jingeh naka jingduk jingkyrduh ka dei ka iing jong ka kong Blistoria Laloo kaba shem jingeh mad ïa ki jingjynjar ha ki snem bala leit noh, hynrei da ka jingkloi jong ki dkhot ban iohi ïaka jingeh jong katei ka longkmie kila shim da ka sienjam ban pynshna syndon da ka iing ba kan shong kan sah.
Ïa katei ka iing la leit ruh ban aiti hynnin ka sngi da u Bah Dundee Cliff Khongsit General Secretary ka FKJGP sengkmie haka jingdonlang u Bah Luistar Lyngdoh President ka FKJGP Ri-Bhoi District, Samla Shanlang Diengdoh General Secretary, u Samla Nangkiew Sohktung lem bad kiwei kiwei ki nongïalam na Myrdon Circle.
U Bah Dundee Cliff Khongsit kum u nongïalam ka seng haba kren ha katei ka sngi u la ai ka jingïaroh bad pynpaw ka jingsngewkmen ïaki dkhot ka Myrdon Circle kiba la leh ïaka kam bah ban ïarap tynrong lem ïaka jingeh jong ki longiing ba duk ba rangli ha katei ka shnong ba kin lah pat ban iohi ïaka khmat bap huh samrkhie jong ki hadien ba kum ka seng kala lah ban pynshna syndon da ka iing.
U la ong ruh ba kane ka long ka nuksa kaba bha ïakiwei pat ki dkhot jong ka seng ban trei ïaka bha ka miat bad ban kyntiew ïaka imlang ka sahlang ban ïarap ïaki para bynriew ka thong ba hakhmat eh jong ka seng da kaba kyntu ruh ba kin dang lah shuh shuh ban trei kham bha bad ban ai ka jingshakri kaba bha tam sha ka imlang ka sahlang.
Naka liang ka kong B Laloo kaba la iohpdiang ïa katei ka iing ba thymmai kala pynpaw ka jingsngewnguh kaba khraw ïaka seng FKJGP hadien ba kala ioh da ka iing ba paka bad lait naka sngi u slap kumba ha ki snem bala leit noh ka hap ban shong ban sah haka iing kaba la jot la pei bad isangsot ban peit ryngkat ka jingkitbok ïaki nongïalam ka seng ba u Blei un dang kyrkhu ïaki ba kin dang lah shuh shuh ban leh ki kam ba bha haka imlang ka sahlang.
