Shillong, Jymmang 04 : U Myntri ka tnad Pule Puthi ka sorkar jylla, u Bah Lahkmen Rymbui u khlem kular satia ba ka pisa kaba ki samla pule ki la dep thep na ka bynta ban ïakhun ïa ka eksam Common University Entrance Test (CUET) ba yn pynphai biang sha ki lada kim ïakhun shuh ïa katei ka eksam.
Haba kren bad ki lad pathai khubor, u Myntri u la ïathuh ba katkum ka jingïakren hapdeng u Myntri Rangbah ka jylla bad u Myntri ka tnad pule puthi jong ka sorkar pdeng ka paw ba ki samla pule ba thmu ban leit pule ha kito ki college bym don bynta bad ka skulbah NEHU lane ha ki college jong ki riewshimet kim donkam satia ban ïakhun ïa katei ka eksam CUET.
Da kaba pynshlur ïa ki samla pule ba kin leit ban thoh beit ïa katei ka eksam, u Myntri u la ong, “Ka jingthmu jong ka CUET kam mut ba phin leit klas tang ha Meghalaya hynrei ka plie lad ruh ba phin leit klas ha baroh skulbah ne ki jylla kiba pyntreikam ïa katei ka Entrance Test.”
Nalorkata, u ong ruh ba katei ka pisa kaba 550 ba ki la dep thep kan ym sepei namar lada ki leit ban thoh ïa katei ka eksam ka jingtip kaba ki ïoh kan pynïar ïa ka jingmut jingpyrkhat jong ki nalor ba kin ïoh jingmut shuh shuh ruh kumno ban thoh ïa kiwei pat ki eksam kynthup wat ïa ka entrance test jong ka Post Graduate.
