Khliehriat, Risaw, 29: U MLA jong ka Khliehriat Constituency u Bah Kyrmen Shylla uba long ruh u Myntri jong ka Sorkar Jylla u la pynshlur ïa ki khynnah bad ïa ki samla ba kin kham pynleit jingmut ha ki kam kilan met kiba ai jingmyntoi ïa ka koit ka khiah khnang ban lait na ka shrip jong u drok.
U Bah Shylla u la khot la wer ïa ki samla bad ïa ki nongshong shnong jong ka Khliehriat Constituency haba kren ha ka jingïalang ban pynsngewthuh paidbah halor ka jingdonkam ban kiar na u dih drok bad ka kam khaii drok ba la pynlong da ka Red Ribbon Club (RRC) ryngkat ka jingïatreilang bad ka Jaiñtia Eastern College, Khliehriat, ka Kyrmen Foundation, Lad Rymbai bad Meghalaya AIDS Control Society (MACS), Shillong. Ïa kane ka jingpynshai paidbah la pynlong ha ka Lah Sngi u Blei mynta ka taiew.
U la pan ruh ïa ka jingïatreilang na ki kynhun bapher bapher ban ïakhun thma pyrshah ïa kane ka jingma kaba la pynshong syier shibun ïa ka imlang ka sahlang.
“Ngi ban ïalap pyrshah ïa ka jingdih bad khaii drok da kaba pyndonkam ïa ka Social Media bad nga pynshlur ïa ki nongshong shnong khamtam ïa ki samla ba kin ïashim bynta ha ki jingkilan met kiba ai jingmyntoi ïa ka koit ka khiah,” u la ong shuh shuh.
Da kaba pynksan ïa ka jingdonkam ban pynkhlaiñ ïa ki jingïatreilang, u Bah Shylla u la ban jur halor ka jingdonkam ban sangeh noh ïa ki jingkren beiñ ne ñiewbeiñ pyrshah ïa ki briew kiba ïoh ïa ka jingpang HIV/AIDS hapoh ka imlang ka sahlang.
Ka Programme Manager jong ka Mih-myntdu Community Social Welfare Association (MCSWA), Khliehriat ka Kong R Patlong haba kren halor ka phang, “Ka jingsniew kaba mih na ka jingpyndonkam ïa ki jingdih pynbuaid” ka la pynpaw ïa ki daw ba ki samla ki ngop ha ki jingdih pynbuaid ki kynthup ïa ka jingpyrshang, ka jingpynbor na ki paralok, ki jingeh ha ka longïing longsem, ki jingeh ha ka jingmut jingpyrkhat bad ka jingsuk ban ïoh ïa kum kine ki jingdih buaid.
Haba kren halor ka jingktah jong ki jingdih pynbuaid, ka Kong Patlong ka la pynpaw ba ka jingdih drok, ka jingdih kyiad ka ktah ïa ka met, ka jingmut jingpyrkhat bad ïa ka imlang sahlang jong ki lanot bad ka la kren jlan ruh shaphang ki jingeh ha ka liang ka aiñ kiba ïadei bad ka jingdih drok.
U Cluster Programme Manager jong ka Meghalaya AIDS Control Society (MACS), Khliehriat u Bah Sandy Tariang haba kren halor ka phang “Ka bynta jong ki samla ban ïada na ka jingsaphriang ka jingpang HIV/AIDS “u la pynshai halor ki daw jong ka jingsaphriang jong ka jingpang HIV/AIDS kiba kynthup ïa ka kam ïashongkha kaba khlem jingïada, ki thyrnia injek ba la pyndonkam, ka jingai snam ne lyngba ki tiar ai snam ba la ïoh ïa ka jingpang, ka jingsaphriang na ka kmie kaba ïoh ïa ka jingpang sha u khunlung ba dang kha, bad kiwei kiwei katba dang pynpaw ruh ïa ka jingsumar ïa ki briew kiba ïoh ïa ka jingpang HIV kaba kynthup ïa ka jingsumar pyrshah ïa u khñiang jingpang HIV.
Shwa kane la pynlong ïa ka jingïaid rally ba la ïashim bynta da ki khynnah skul bad ki nonghikai na Parking Lot bad pynkut ha madan Khliehriat Higher Secondary School.
Ha kane ka sngi la ïashim bynta lang da u Principal jong ka Jaiñtia Eastern College u Dr. P. Nongtdu, ki Waheh Shnong, ki nonghikai bad ki khynnah skul.
