Pynshlur ka NVHCP ïa ki briew ban wan shakhmat ban leh ïa ka test HIV

Khliehriat, Nailar, 12: Ka Mih-Myntdu Community Social Welfare Association (MCSWA), ha ryngkat ka jingïatreilang bad ka Megha laya AIDs Control Society (MACS), Shillong mynta ka sngi ka la rakhe ïa ka International Youth Day 2025 bad ha kane ka juh hi ka sngi la sdang ïa ka jingïalap paidbah ne ka Intensified IEC Campaign ha Khliehriat West Community Hall, Khliehriat.
Haba kren ha ka jingïalang u Additional Deputy Commissioner, East Jaiñtia Hills District, u S. R. Marak, u la ong ba ka International Youth Day ka dei ka sngi ba kyrpang jong ki samla, u la ong ruh ba ka dur khmat jong ki samla ka dap tang ki jingïaleh suda ha kine ki sngi, kaba kynthup ruh ki jingïaleh ha ki jingmut jingpyrkhat, ka jingïaid lynti ha ka pyrthei digital bad ki jingeh kiba ïadei bad ka ïohkam ïohjam bad ka ïew ka hat bad kiwei kiwei.
Haba kren shaphang ka technology bad ka social media kum ki bynta ha ka ïakren ïakhana ne communication, u Marak, u la ong ba ka technology ka la buh jingeh bha kum ki jingma ba ju tip kum ki cyber crime ne ki cyber bullying bad kiwei kiwei, ki jngeh bad ka jingsngew noh mynsiem ne ka low self-esteem.
U kyntu ruh ïa ki samla ban ïakhun ban poi sha ka jingim kaba don jingmut bad ka jinglong jingman kaba khlaiñ ba kin long kiba ler kam ym tang ïalade hynrei wat ïa ka ïing ka sem bad ka imlang ka sahlang ruh.
Ka District Immunization Officer (DIO), East Jaiñtia Hills District, ka Dr. N.P Suchiang ka la kren halor ka jingdonkam ban pyndap ïa ki samla da ka jingstad kiba donkam ba kin tip bad ban ïalam lynti ruh ïa ki ha ka rukom kaba dei, ka la kyntu bad pynshlur ïa ki samla ba ki dei ban ïa shimbynta ha kino kino ki kam kiba bha ki ba lah ban ïarap ïa ki ban tei ïa ka jingmut jingpyrkhat bad ba kin ïoh ïa ka lawei kaba phyrnai ha ka imlang ka sahlang.
U District Nodal Officer, Treatment Centre, National Viral Hepatitis Control Programme, East Jaiñtia Hills District, u Dr Dawanroy Nongpluh u la kren halor kumno u khñiang HIV u rung sha ka met u/ka briew bad kumno ban ïoh ïa ka bor met ne ka immune system ban ïakhun pyrshah ïa u khñiang jingpang.
Ha kaba ïadei pat bad ka prokram Intensified IEC Campaign, la pynlong da ka rally kaba la sdang naduh Dkhiah East Community Hall Compound (Lad Sutnga) shaduh Khliehriat West Community Hall, ka thnong jong kane ka prokram ka long ban pynshai paidbah halor ka jingpang HIV bad ban pynshlur ïa ki briew ba kin wan shakhmat ban leh ïa ka test HIV.
Kiba la ai jingkren ha kane ka prokram ki kynthup u Medical & Health Officer, in-charge OST, Centre, Khliehriat, u Dr J. Nongtdu, ka Counsellor OST, Centre, Khliehriat, ka kong Veny Mary Syih, u Headmaster, Dkhiah East Secondary School,Dkhiah, East Jaiñtia Hills District, Dr. B. Nongtdu bad kiwei kiwei.
La pynbyrngia ïa ka prokram da ki jingshad tynrai na ki khynnah pule jong ka Jaiñtia Eastern College Khliehriat bad la sam ruh ïa ki prize sha kiba jop ha ka jingïakop pyni Placard lane ka Placard Competition ha kaba ïadei bad ka HIV&AID ha kaba ka skul Ambrose Memorial Secondary School, Khliehriat ka la ïoh ha ka kyrdan ba nyngkong, ka Little Flower Secondary School, Khliehriat ka ïoh ïa ka kyrdan ba ar bad ka Dkhiah East Secondary School, Dkhiah ka ïoh ba lai.
Kiba la ïa don ryngkat ha kane ka prokram ki kynthup ruh ka Assistant Commissioner, East Jaiñtia Hills District, ka kong Eureka D. Shira, MCS, ka District Child Protection Officer, East Jaiñtia Hills District (DCPO), ka kong R. Kynjing, u Medical & Health Officer, in-charge Opioid Substitution Therapy (OST) Centre, Khliehriat, u Dr J. Nongtdu, ka Programme Manager, Mih-Myntdu Community Social Welfare Association (MCSWA), ka kong R. Patlong, ki nonghikai, ki khynnah skul bad kiwei kiwei.