Khliehriat, Naitung, 19: Ka National People’s Youth Front East Jaiñtia Hills District ha ka sngi Saitjaiñ ka la pynkup burom ïa ki laiphew ar ngut ki samla pule kiba la pas bha bad kiba ïoh ïa ki percentage kiba heh ha ka SSLC bad HSLC.
ïa ka prokram la pynlong ha Khliehriat West Community Hall bad ka MLA jong ka Sutnga-Saipung Constituency ka Kong Santa Mary Shylla ka la long kum ka kongsan bad u Chairman jong ka Jaiñtia Hills Autonomous District Council (JHADC) u Dr. Sankey Shangpung kum u Symbud Kongsan.
Haba kren kum ka kongsan, ka Kong Santa Mary Shylla, ka la ai khublei ïa baroh ki samla kiba la shah pynkup burom ba kin nang kiew irat shaphrang ha ki jingpule jong ki.
Ka la kyntu ïa ki samla pule ba kin nang treishitom shuh shuh ban poi sha ka thong bad kyntu ruh ban kin burom iwei ïa iwei khamtam ïa kiba heh ba san. Ka la ruh ka jingsngew kmen ba ka East Jaiñtia Hills District mynta u snem ka la kynjoh haduh 80 percent kiba pas ïa ka eksamin matrik bad kane ka pynpaw ba ka la don ka jingïakum ha ka pule puthi.
Ka la ong ruh katba nang ïaid ki por ka jingïakhun ka nang iar kumta donkam ban ban khrehkot bha ban poi shakhmat.
“Ka jingstad ka dei kaba ym lah ban thied, ka dei ka spah bah ha ka jingim, jied ïa ka jingim kaba beit ka ban wanrah ïa ka burom ïa ka ïing ka sem ïa ka district bad ka jylla baroh kawei, ka jingnang jingstad ka neh baroh shirta, wat peit ïa ki lok hynrei jied bad pynskhem ïa ka jingthmu ban poi sha ka thong, ” ong ka Kong Santa.
Ka la bynrap ruh da kaba ong ba ka Sorkar MDA ba lamkhmat da ka NPP ka la leh bun ki kam babha ha kaba ka la lah ban wanrah bun bha ki lad jingïarap ïa ki paidbah bad kumjuh ruh ïa ki samla pule jong ka jylla ban kyntiew ïa ka pule puthi.
Ka la kyntu ba kin mihshakmat ban shim kaba ïa ki lad jingïarap ba ai ka Sorkar bad ong ruh ba kane ka jingpynkup burom ïa ki samla pule long ban pynshlur ïa ki samla pule ba kin nang leh bha shuh shuh bad ba kin nang trei shitom ha ki jingpule jong ki.
U Dr. Sankey Shangpung haba kren ha kane ka sngi u la sneng bad kyntu ïa ki samla da kaba ai mynsiem ba kin nang trei shitom shuh shuh nangne shakhmat ban poi sha ka thong, ban long ruh kiba bat ïa ka akor ka burom. U la kyntu ba kim dei ban pynbun jingmut jingpyrkhat hynrei ban buh beit ïa ka thong hakhmat ban kynjoh sha ka thong shuh shuh ruh ban long ruh kita ki nongai kam ai jam ïa kiwei ruh.
U MLA jong ka Jowai Constituency Bah Wailadmiki Shylla u la pynsngew ba ka NPP ka don ka jingthmu ban buh ïa ki Students Cell ban ïarap ïa ki khynnah pule bad ong ba kane ka Sorkar ba ïalam da u Myntri Rangbah ka jylla u Conrad Sangma ka ladep mynjur ïa ka Sport Employment Policy ka lad ïohkam ïa kito kiba don sap ha ka jingïalehkai sports kiba mihkhmat na ka jylla bad poi shaduh ka National Level bad shabar ri. U la kyntu ïa kito kiba don ka sap ba kin dohïap bad treishitom.
Shuh shuh u ai mynsiem bad kyntu ïa ki samla pule ba ki dei ban long kiba skhem jingmut ïa kaei kaba ki thrang bad angnud bad treishitom haduh ban da lah ban pynurlong ïa ka jingangnud ym ban long kita kiba kylla jingmut na ka por sha ka por, hynrei ban pynshisha dalade ïalade ba phi don ka jinglah ban leh ïa kaba phi thmu bad buh thong ha ka jingim.
Ha kaba ïadei bad kane ka jingpynkupburom, u MLA na Jowai u la pynshai ba ka National People’s Youth Front ka la dep buh ïa ki kyndon bad ka la dep pynshai ruh ba kiba aplai ïa kane ka khusnam bad jingpynkupburom ki dei ban kynjoh ïa ka 75 percent ki marks ha ka exam HSLC, 80 percent ha ka SSLC MBOSE, CBSE bad ICSE, kiba aplai na ka bynta SSLC la buh 80 percent shaneng ïa ka MBOSE bad 85% ïa ka CBSE & ICSE kane ka dei kaba la dep pynbeit, u la ong ruh ba la ïohi ba katba nang mih ki snem ka result ka nang bha nang bha ha kaba tang na ri lum Jaiñtia na West bad na East Jaiñtia ki ba aplai ki don ym duna ïa ka 400 ngut, ha East Khasi Hills ym duna ïa ka 700 ngut, la pynshai ruh ka kam shym don kano kano ka jingbuh kyndon ban jied tang ïa kiba kyrshan NPP hynrei la ailad lut ïa baroh ban aplai tangba ki dei ban long katkum kitei ki kyndon ba la pynbeit, la ong ruh ba kane kam dei kata ka bynta ban pynbiej election ne ban sdang leh politik hynrei kane ka jingpynkupburom ïa ki samla pule ka long ban ithuh bad sngewthuh ïa ka jingtreishitom ki khynnah pule bad ruh ban pynshlur ïa ki samla pule ba kin trei shitom shuh shuh ha ki jingpule jong ki bad ba kin kynjoh sha ka thong ha ka jingim.
Kiba la ai jingkren ki kynthup ruh u MDC jong ka Sutnga-Narwan, u bah Seibor Shadap, uba dei ruh u President NPP na East Jaiñtia Hills District, ka MDC Khliehriat- Rymbai, kong Violet Lyngdoh, u Resource Person, u bah Eladmiki Suting bad kiwei kiwei, ïa ka jingpynkupburom da ki momento bad ki syrnot la sam da ka kongsam, symbud kongsan bad u bah Wailadmiki Shylla sha ki 32 ngut ki samla pule kiba na EJHD bad ïa ka prokram la pynïaid da u bah G.H.Pyrnge, uba dei u Vice President NPP East Jaiñtia Hills District.
