Pynshitom bad jingpynsaja tyngeh ïa u runar ba bat bor ïa i khyllung ba dang 1 snem 8 bnai : FKJGP

Mawkyrwat, Naitung, 14: Ka Federation of Khasi Jaiñtia & Garo Peoples jong ka South West Khasi Hills District ka la pynrem jur ïa uwei u runar uba la bat tnga jubor ïa iwei i khyllung ba dang don ha karta kaba 1 snem 8 bnai ha kawei ka shnong hapoh jong ka South West Khasi Hills District.
U General Secretary ka Federation of Khasi Jaiñtia & Garo Peoples (FKJGP) jong ka South West Khasi Hills District, u Bah Balse Kharbani haba kren ha ki lad pathai khubor u la pynpaw ka jingsngewlem na ka bynta i khyllung bad kumjuh ruh ïa ka ïing ka sem jong i namar kane ka jingleh une u runar ka long kaei kaei ka kam ka bym lah ban pdiang ha ka imlang ka sahlang bad lah ban ong ruh kaba pynpar ‘ñiang khriat ruh ïa ki paidbah bad ïa ki khyllung khynnah.
Namarkata, kum ka seng ka sngewban phah ka khubor ban pynrem jur ïa kum une u jaid briew u bym don shuh ka raiñ ka rem ne ka jingïatip lem wat ïa ki khyllung khynnah ruh ha kaba u la bud ban leh ïa kum kane ka kam ha ka por mynsngi mynshai. Kumta ka seng ka buh ka jingdawa ïa ki bor jong ka aiñ ba ki dei ban ai ka jingpyn-shitom bad ka jingpynsaja kaba tyngeh da ki kyndon aiñ kiba kham khlaiñ ïa kum une u briew khnang ba un nym lah shuh ban lait.
Kum ka seng ka la buh ka jingkyrpad na ka bynta kiba ha ïing ha sem ba lada ki donkam kano kano ka jingïarap kin pyntip ha ka seng namar kum ka seng ka kloi ban ïarap la ha kano kano ka bynta.