Pynshai u WS Daistong bad ki nong shnong shnong halor ka jingshah kynnoh ba ai NOC sha ka Shree cement Ltd khlem tip ka DS
Khliehriat nohprah 1: U Waheh Shnong jong ka shnong Daistong, u bah Himon Pajuh lem bad ki nong shnong shnong haba kren sha ki pathai khubor mynta ka sngi ki la pynshai halor ka jingshah kynnoh ba la mih ba la kynnoh ba leh donbor u Waheh Shnong ha kaba ai syrnot NOC sha ka company dewbilat ka Shree cement Ltd kaba thmu ban buh karkhana hapoh shnong Daistong kaba hap hapoh elaka Nongkhlieh East Jaiñtia Hills District.
Na ka liang u Waheh Shnong u la kubur ba ki don ruh kumba 15 percent na ki nong shnong shnong kiba pyrshah ïa ka Shree cement Ltd bad 85 percent pat ki dei kiba kyrshan bad mynjur ban ai ïa ka NOC u la ong ba na ka liang jong u Waheh Shnong un don jingkhang ïa kita ba pyrshah ruh bad ong ba ka shnong ha ka mon jong ki la ki kwah bab pyrshah ne ki kwah kyrshan ruh katba ki sngew bit tangba kum u Waheh Shnong u hap ban sngap ïa ka sur u paidbah uba bun ba lang.
U la ong ba ha kaba ïadei bad kane ka jingai NOC, ha ka Dorbar Shnong ba la pynlong nyngkong ki la don mar shiteng na ki nong shnong shnong kiba la pdiang bad mynjur ban ai ïa ka NOC bad ha ki Dorbar ba la pynlong biang hadien ba la pynlong haduh hynriew sien bad ka Dorbar ba pynlong khatduh ka dei ha ka 8 tarik u nailur 2025 ki la don haduh 85 percent kiba la mynjur ban ai NOC kumta u la kyntait ïa ka jingkynnoh kaba ong ba ka jing ai NOC ka dei kaba khlem ka jingtip ka Dorbar Shnong bad la kynnoh ruh ba ka dei ka jingshim rai u Waheh Shnong marwei.
Ki nong shnong shnong kiba kyrshan ïa ka jingai NOC kiba la kren ha ki pathai khubor ba kynthup u Assistant Waheh Shnong Daistong, u bah Hoimatlang Phyrngap, ki dkhot Shnong ba kynthup u bah Pheing Sutnga, bah Longsing Lamare lem bad kiwei kiwei ba kynthup ruh ki khun samla bad ki longkmie ki la pynpaw ka jingsngew khia halor ka jingshah kynnoh ba leh marwei u Waheh Shnong bad ki la kubur ruh ba ka jingai NOC ka dei kaba la shim rai da ka Dorbar Shnong bad ong ba kam dei satia ka jingleh sop sop ne leh tuh u Waheh Shnong kumba la kynnoh hynrei ka dei ka ba la shim rai ha ka Dorbar Shnong hi bad bynrap ba ka la don ruh ka jingpyrta Shnong ha man la ka por ba khot pynlong Dorbar ha Shnong bad baroh ki nong shnong shnong ruh ki la ïa poi lang sha ki Dorbar Shnong ba la pynlong.