Shillong, Risaw 6 : U Myntri ka Koit ka Khiah U Ma Wailadmiki Shylla, ha ka sngi Nyngkong, ula pynshai ba ka jingai ïa ka bhah pule MBBS na ka bhah pule ka Jylla, ka dei kaba la leh kat kum ka Standard Operating Procedure (SOP).
Haba jubab ïa ka jingkynnoh ba leh bym hok, u Bah Wailad haba ïakren bad ki nongthoh khubor ula ong watla ki don katto katne ki jingsngewkhia bala pynsngew da ki Sengbhalang kynthup ka KSU bad JSU, hynrei kaba bun hi na kane ka kam ka dei kaba la lah ban pynbeit.
U Myntri ula batai ba kat kum ka SOP, ki samla pule ba ïoh bun marks heh (top score) na ka thup jong ki Khasi-Jaintia ki lah ban jied ban ïaineh hapoh ka bhah bala buh kyrpang (reserve category) ne ki lah ban jied ïa ka bhah ba khlem buh kyrpang (unreserved) Hynrei, hadien ba pynsngew ïa ki jingsngewkhia da ki Sengbhalang, kine ki samla pule kila pynpaw ïa ka jingkloi ban shim noh ïa ka bhah ka ba khlem buh kyrpang.
Related Posts
Hadien ka jingialang, la shim ïa ka rai ba yn pyntreikam ïa ka jingkyrpad ki samla pule.“Ka samla pule kaba dei ka topper na ka reserved category ki Khasi Jaintia, ka dei ha ka jingshisha ban leit noh sha ka thup unreserved category namar ka marks jong ka, ka kham heh ban ïa kiwei ki kyrtong. Hynrei ha ka SOP, ka kren shai ba ka shong ha ka kyrtong ban jied. Namar ba ka lah ban jied ïa baroh artylli-unreserved bad reserved category, ka shong ha ka ban jied. Haba nyngkong, kala pynpaw ba kan jied beit ïa ka bhah ki Khasi-Jaintia, na kata ka daw ngi la pyllait ïa ka thup. Hadien haba ki sengbhalang kila pynpaw ïa ka jingsngewkhia, ka ruh kala phone bad kala pynpaw ba ka kloi ban leit noh sha ka unreserved category” ula ong.
“Namar kata, mynta ka sngi ngi la khot ïa ka jingïalang bad baroh ki don ïa ka jingsngew, naba kane ka samla kala mynjur, kumta na ka Tnad ruh kam don jingeh shuh. Nga tharai ba mynta lah dep pynbeit lut ïa kiei kiei baroh” ong u Ma Wailad.
Haba ïadei bad ka jingseng ïa ki medical college ba thymmai, u Myntri ula pynpaw ïa ka jingkwah jong ka Sorkar ban seng ïa ka medical college ha Jowai, Nongstoin bad kiwei pat ki bynta jong ka Jylla. Hynrei, ula ban jur ba ka jinglah ban pyntreikam bad ka jingbiang ka pla tyngka kan long kaba kongsan ha ka ban pynthikna la kine ki project ki long ne em ban pyntrei.
Halor ka jinglong jingman ki artylli ki medical college, u Ma Wailad ula ong ba ka jingïasyllok ka dang ïaid ban pynrung klass ïa ki samla pule ha Shillong Medical College katba ka jingtei jong ka Tura Medical College ka dang sahteng ban pyndep.