Pynshai u MLA ka Umsning halor ka Roster bad RP

Nongpoh, Jylliew 06: U MLA jong ka Umsning u Dr C Lyngdoh mynta ka sngi u la lum shuwa ïaki nongkitkam bad nongïalam jong ka party Congress mynta ka sngi ha Umsning naka bynta ban pynshai paidbah halor ka Roster System bad ka Reservation Policy, ha kaba da ki spah ngut ki nongïalam kila wan ban sngap ha katei ka sngi ban ioh ka jingpynshai.
U Dr. C Lyngdoh haba kren ha katei ka sngi u la ong bun naki paidbah, ki sengbhalang kila kynthoh halor ka jingsngap jar jong u ban kren shaphang ka Reservation Policy bad don ruh kiba leit tied tin ha ïing, hynrei balei nga sngap jar ha kane ka bynta namar baroh u paidbah u la don ka jingsngew um nang shuh ban pyrkhat kaei kaba beit bad kaei ka bym beit kaei kaba ioh nong bad kaei kaba duhnong.
“Haduh mynta ka VPP kam pat ai bad pynshai kaei ka jingkylla ba ki kwah naka sorkar ha kaba ïadei bad ka Reservation Policy bad ha kano ka rukom ba ki kwah ban pynkylla, lada ki paralok Garo ki hun ban ïakhun lang ïaka 80% bad Khasi bad Garo ka suk te ban pynkylla, hynrei u Garo un nym treh bad kan sa poi ka por ba un sa leit sha ïing bishar ban dawa la ka hok” la ong u Dr. C Lyngdoh da kaba bynrap ruh ba lada ki Garo kim treh mano ban pynngeit, ka sorkar ka ong ban thaw ïaka expert committee ban peit ïa kane ka bynta, hynrei ka u Dr C Lyngdoh u la pynshai ba ka Expert Committee kam lah ban ïaid lait ïaka Mandal Commission Report bad baroh ka rai ha kaba ïadei bad ka Reservation Policy kiba poi ha High Court bad Supreme Court, ka Supreme Court ka ong beit katkum ka jingpynthikna da ka Mandal Commission Report ym lah ban buh Reservation palat ïaka 50%, hynrei haka jylla jong ngi, ngi ioh haduh 80%.
Shuh shuh u la ong ruh ba kala dei ka por ban pynkylla noh ïaka Reservation Policy hynrei kaei kata ka jingkylla kaba ngi kwah ym don ba ïakren haduh mynta, u ba shah thngan u la shah thngan bad sangeh noh mynta hynrei naka liang ka VPP kam pat pynshai kaei kata ka jingkylla kaba ki kwah, haka Reservation Policy bad ban kdew shai ïakino ki bynta ban pynkylla.
Hadien ba la thaw ïa kane ka Expert Committee bad hadien ba u nongshah thngan (Bah Ardent) u la sangeh nga sngewsih ban ong ba ha kawei ka sngi ynda ka expert committee ka ong nangne shakhmat ki Khasi Jaintia bad Garo kin sa ioh tang 60% ban ïa sam, bad haka por bym pat pynkhih ngi ioh 80%, te namar ba ngi la dawa palat ban pynthymmai bad pynkylla ïaka Reservation Policy ka Expert Committee kan sa ong ïasam tang 60% hapdeng ki Khasi bad Garo hato ka dei ka jingduhnong ne iohnong? La ong u Dr C Lyngdoh.
Bad hadien bala mih kane ka huri hura u MLA na Rajabala u la Dr Azad Zaman u ong ba ngi ruh ngi dawa 50% dei ban long naka bynta baroh (Unreserve) bad lada ka sorkar ne ka ïingbishar ka tuklar, kata ka jingdawa jong u kam bakla, namar ngi im haka ri ba bun ki jaitbynriew, hynrei ngi dei pat ban nang ban kren ba kata ka jingkren kan pynduhnong ne kan pyniohnong.
U Dr C Lyngdoh u la iohi ruh ïaka jingma kaba la ap lypa ba lada ka ïing bishar kan tuklar ha kata ka por naka 80% sha ka 60% ne 55% hangta phin sa ong ba pleng ka VPP ka la ïalam bakla, namar dei hadien bala don ka jingïatai ñia bad ka jingbalaiñ stad ha Assembly ba ka ïing bishar kala hukum ban pyntreikam noh ïaka Roster System kaba baroh shi katta ki Khasi ki ioh jingmyntoi, namar wat ïaka kam kaba ki Garo kim lah, ki khasi ki ioh ban thep haki por ba mynshuwa hynrei naka jingtreikam jong ka Roster ka post jong ki Garo ki Khasi kim lah shuh ban thep.
Namarkata naka liang u Dr C Lyngdoh u la ong haba ngi dawa ïa kano kano ngim dei ban dawa da ka jingsngew (sentiment) hynrei da ka jingstad bad ka bor jabieng khnang ba kino kino ki jingdawa kim dei ban ktah hynrei ban seisoh.