Shillong, Naitung, 15: U Secretary jong ka Harijan Panchayat Committee (HPC) u Gurjit Singh ha ka sngi Thohdieng u la ïathuh ba kam pat don kano kano ka jingshim rai kaba khatduh na ka liang jong ka Sorkar Jylla ban ai jaka ïa ki Harijan lada pynkynriah noh ïa ki na Them Ïew Mawlong.
U la ong ba ka jingmih ha ki lad pathai khubor ha kaba ïadei bad ka jaka ha Them Mawbah, ka dei tang ka jingpyrshang jong ka Sorkar ban wad ïa ka jaka na ka bynta ban pynïoh jaka sah ïa ki Harijan lada pynkynriah noh na ka jaka kaba ki sah mynta.
“Ka Sorkar lyngba ka tnat Pynroi Sor ka la pynsngew ha ngi ba ka la wad bun tylli ki jaka ha European Ward na ka bynta ban shna ïing ïa ngi lada ngi la shah pynkynriah noh na Them Ïew Mawlong bad ka jingithuh ïa ka jaka ha Them Mawbah ka dei na kiwei ki sienjam ba ka Sorkar ka la leh,” ong u Gurjit Singh.
Shuh shuh u la banjur ba ka Harijan Panchayat Committee (HPC) kan ieng beit halor ka nongrim ban dawa ïa ka Sorkar ban pynïoh jaka ha Europeon Ward ïa baroh ki longïing ki ban shah pynkynriah na Them Ïew Mawlong.
“Hynrei haduh mynta kam pat don kano kano ka rai ba khatduh na ka liang jong ka Sorkar,” la ong une u nongïalam ka HPC.
