Nongpoh, Naiur 03: Halor ki jingshah kynnoh ba khhlem nongrim bad kiba ym don ka jingshisha ha u Sorbar ka Shnong Patharkhmah, u MLA ka Jirang Constituency, u Bah Sosthenes Sohtun mynta ka sngi u la pynshai paidbah lyngba ki lad pathai khubor halor ki jingshah kynnoh pyrshah ïa , da u Bah Najim Kharmalki Sordar Shnong ka Patharkhmah halor ki kam pud ki kam sam kiba dei hapoh ka Jirang Constituency.
Kum ban pynkynmaw, u MLA ka Jirang Constituency, u Bah Sosthenes Sohtun u la wan ban pynshai paidbah halor ka jingshah kynnoh jong pyrshah ïa u da u Sordar Shnong ka Patharkhmah, ka dei halor ka jingïalang ka seng Hynñiewtrep Youth Council (HYC) ba ka la pynlong ban ïaid paidbah ryngkat ka jingïalang paidbah ban pyrshah halor ki kam pud ki kam sam kaba la dep ban long ha ka 30 tarik u Nailar ha Patharkhmah, hynrei ha kane ka jingïalang la kynnoh bad kumba la mih ha ki lad pathai khubor, u Sordar Shnong ka Patharkhmah u la kynthoh kylla ïa u MLA ka Jirang Constituency halor ki kam kiba ïa dei bad kitei ki kam pynbeit pud hapdeng ka sorkar Meghalaya bad ka sorkar Assam.
Ka jingkynthoh u Sordar Shnong ka Patharkhmah, u Bah Najim Kharmali, kaba la pynlong ïa u MLA ka Jirang ba hap ban pynshai paidbah, ka dei halor ka nongrim ba u la kynthoh ba u MLA ka Jirang um shym la leh ei ei halor ki kam pynbeit pud pynbeit sam bad la kynnoh ruh ba u la shu lum sop sop ïa ki kot ki sala (Dulir) na ki Hima bad la shu leit ban aiti sop sop sha ka sorkar da kaba kynnoh ruh ba u leh sop sop ïa kane ka kam pynbeit pud khlem ka jingtip ki Hima bad ki paidbah.
Haba ïa kren mynta ka sngi bad ki Nongthoh Khubor, u MLA ka Jirang, u Bah Sosthenes Sohtun u la ong ba kum u nongmihkhmat paidbah na Jirang Constiteuncy, un nym lah ban pdiang ïa ki jingkynthoh u Sordar Shnong ka Patharkhmah bad baroh ki jingkynnoh kiba u la thad pyrshah ïa u kum u nongmihkhmat ki long kiba ym don nongrim bad kiba ym shisha.
“Ka jingkynthoh ba la lum sop sop ïa ki kot ki sla na ki Hima ka dei kaba bakla bad kaba khlem nongrim bad ha ka jingshisha kum u MLA um shym la lum sop sop ïa kita ki kot ki sla na ki Hima bad ha kaba ïa dei hi bad ka kam pynbeit pud ban lum ban lang ïa ki kot ki sla ki dei ka kamram jong ka Regional Committee ba la thung da ka sorkar, hynrei kitei ki jingkynnoh utei u Sordar Shnong ka long kaba bakla bad kaba u kwah tang ban ïalam bakla ïa ki paidbah ka Jirang Constituency” pynshai u MLA ka Jirang, u Bah Sosthenes Sohtun.
U Bah Sohtun kum u MLA ka Jirang u la dawa ruh na u Sordar ka Patharkhmah, u Bah Najim Kharmalki, ba u hap ban pynshai paidbah bad ruh ban ai ïa ki sakhi ki satar mynno u la leit lum sop sop ïa ki kot ki sla na ki Hima bad lada u don shisha ka sakhi satar u lah ban kynnoh kumba u la kynnoh bad lada um don ka sakhi satar kine baroh ki jingkynnoh jong u, ki dei tang ba u kwah ban pynjah burom bad ban ïalam bakla ïa ki paidbah ka Jirang Constituency.
Shuh shuh, na ka liang u MAL ka Jirang, u Bah Sosthenes Sohtun, u la buh ruh ka jingkyrpad sha ki paidbah ka Jirang Constituency ba kim dei ban sngap ïa kitei ki jingkynthoh ba khlem nongrim u Sordar ka Patharkhmah bad lada ki kwah ban tip ïa ki jingshisha ki lah ruh ban wad jingtip da ki Syiem jong kitei ki Hima la u la lum sop sop ne em ïa kita ki kot ki sla na kitei ki Hima kaba haduh mynta um shym la leh ei ei ïa kata bad kane ka jingkynthoh utei u sordar Shnong ka dei hi tang ka jingkwah ban pynjah burom bad ban ïalam bakla ïa ki paidbah, la bynrap u MLA ka Jirang, u Bah Sosthenes Sohtun.
