Nongstoiñ, Naitung 29: Na ka bynta ban pynsngewthuh sha ki paitbah ha kaba ïadei bad ka jingpyntrei kam ïa ki kyndon aiñ bapher bapher, kiba dei ban ka jingai jingtip kaba nyngkong ne ka First Information Report, ka jingïapher hapdeng ka aiñ pynshitom beiñ bad ka aiñ paitbah, ki aiñ kiba lah ban pynïahap bad ki aiñ kiba lah ban ai jamin bad ki bynlah ban ai jamin bad kiwei kiwei ki kyndon aiñ, ka West Khasi Hills District Legal Service Authority mynta ka sngi, ka la pynlong ïa ka prokram ba kyrpang ha Mairang Eastern West Khasi Hills.
Ïa katei ka prokram la pynlong ha Multipurpose hall ha ophis jong u Deputy Commissioner ka Eastern West Khasi Hills, ha kaba la pynïaid da ka kong V.Kharhari kaba dei ka nongsaid aiñ ha ryngkat ka jingïadonlang jong ka kong D.M.K.S Shadap Chief Judicial Magistrate West Khasi Hills cum secretary District Legal Service Authority, u bah B.Lyngdoh First class Judicial Magistrate Eastern West Khasi Hills, ki longkmie long kpa bad ki paitbah nongshong shnong.
Ha katei ka sngi la ïoh ïa ka jingkren na u bah D.Nongpluh Deputy Superintendent of Police Eastern West Khasi Hills, ka kong E.G Kharbani Assitant Public Prosecutor.
Ka kong Khrabani ha katei ka sngi ka la pynshai ha kaba ïadei bad ka jingïoh jamin kloi jong kiba shah kem hadien ba ki la shah set ha phatok. La ïoh ruh ïa ka jingkren na ka kong S.M.Wanñiang Principal Magistrate jong ka Juvenile Justice Board Eastern West Khasi Hills.
Ka kong Wanñiang haba ai jingkren ka la pynshai bniah bha ha kaba ïadei bad ki kyndon treikam jong ka Juvenile Justice Board bad ka tnad pulit ba kyrpang, na kaba treikam na ka bynta ki khynnah rit khnang ban kham pynbha shuh shuh ïa ka jingpyntrei kam ïa ki kyndon aiñ.
