Nongpoh, Ïaïong 04: Kumba la don ka jingkyntoh ha ki social media bad ruh ha ki lad pathai khubor ba ka Shnong Tyrso ka kdup ïa ki bar jylla na ka jingjia kaba la jia ha ka 2 tarik u Ïaïong 2022 kaba dei ka sngi ïew Tyrso bad na ka liang ki Dorbar Shnong bad kumjuh ruh ka Seng Samla Shnong Tyrso Pullun mynta ka sngi ki la mih ban pynshai paidbah ba baroh ki jingkynnoh pyrshah ïa ka shnong Tyrso ka dei kiba shisha bad ka dei tang ka jingkynnoh ba khlem nongrim.
Kane ka jingmih ban pynshai halor katei ka jingshah kynnoh ka dei halor ka jingjia kaba la jia ha ka 2 tarik u Ïaïong 2022 ba la don ki bar jylla kiba wan shong iew ki la shah shoh ha ki briew kiba ym lah ban ithuh dur khmat bad la kynnoh ruh ba ka Shnong Tyrso ka kdup ïa ki bar jylla bad ka la leit ruh ban ujor ejehar sha ki pulit, hyrei ha ka jingshisha ka bor shnong Tyrso kam shym la kdup ïa ki bar jylla bad ruh kam shym la leit ban ujor ejehar sha ki bor pulit.
Ki nongïalam ka Seng Samla Shnong Tyrso Pullun, u Samla Pynsuk Sten kum u President bad u Samla Player kum u Assistant Secretary, ki la pynshai paidbah mynta ka sngi ba baroh ki jingkynnoh kim dei kiba shisha bad ka dei tang ka jingdon jong ki riew shim kabu kiba pyrshang ban pynthobria ïa ka Shnong Tyrso hi baroh kawei.
Kitei ki nongïalam ka seng samla ki la pynshai ruh ba kum ka seng samla bad ka dorbar shnong Tyrso hi baroh kawei ki pynpaw ïa ka jingsngewkhia halor ka jingshah kynnoh ka shnong Tyrso bad kane hi ka dei tang namar ka jingdon ki riew shim kabu kiba pyrshang ban thohbria ïa ka shnong, ong kitei ki nongïalam ka Seng Samla Shnong Tyrso Pullun.
Shuh shuh, ki la pynshai ruh na ka liang ka Shnong bad ka Seng Samla hi baroh kawei kim shym la kdup ïa ki bar jylla bad kum ka shnong ki ju ïada na ka jingwan rung ki bar jylla bad na ka liang ka shnong hi ka ju pyrkhat ruh na ka bynta ka pateng ban sawan jong ka shnong ba ki bar jylla kim ioh ban rung laitluid ha katei ka shnong, hynrei ka jingmih ha ki social media bad ha ki lad pathar khubor ba la shah pynjah burom ka shnong ka dei tang da ka jingdon ki riew shim kabu, bynrap kitei ki nongïalam ka Seng Samla Shnong Tyrso Pyllun.
