Nongpoh, Nailar 01: Ka Dorbar Shnong jong ka shnong Pathardharo kaba la long haka 16/07/2022 kala pynshai paidbah halor ka jingpynmih khubor ka kong Regina Marbaniang haki lad pathai khubor haka 1 tarik Naitung kaba la kynnoh ruh halor ka jingthombor bad pynjot lut ïaki jingthung jingtep jong ka bad kynnoh ruh ba ka shnong kala beh syndon ïaka na katei ka shnong.
Haba phah ïaka kyrwoh naka liang ka Dorbar Shnong Pathardharo, ha kaba ïadei ba katei ka jingkynnoh jong ka Regina Marbaniang naka liang ka shnong Pathardharo ka pynshai paidbah kumne, ba ka jaka baroh jong ki nongshong shnong kaba ngi shong ngi sah ka dei jong ka Raid Saw shnong, kata Umkynsier, Pathardharo, Mawskei Them bad ka Mawskei Lum.
Kumta naka liang ka Dorbar Saw Shnong kala pynbeit bad rai ba kine ki saw tylli ki shnong kin ïa peit bad pynïaid hi ïaka kam khyndew katkum u pud bala dep sam dep phiah, kaba hap hala ki shnong, kumta ngi pynshai ba hapoh ka shnong Pathardharo ngi ka aiñ shnong kaba ai kper bad shna iing ïa u/ka ba mih iing thymmai, kin ym lah ban shu leit shna iing bad rep kper katba mon khlem da ioh jingbit da ka dorbar shnong lyngba ka jingthoh.
Kumta ha kaba ïadei bad ka kong Regina Marbaniang ka Dorbar Shnong kala dep ai mynshuwa ïaka nongrim iing bad ka kper haka por baka dang ia shong bad u lok barim jong ka (Chamborlin Lyngdoh) hynrei kala iehnoh beiñ ïa u lok jong ka bad ki ar ngut ki khun kynthei kala jah na shnong kumba 6 snem eiei.
Ha kata ka por shuwa ba kan mih na iing naka liang kiba ha iing ha sem jong ka baroh kila ïakren bad pynbeit da kaba khot lang ïaki nongïalam shnong ban pynbeit ïaka jingkulmar jong ka bad u lok, hynrei naka liang ka Regina kala rai ba kam kwah shuh ban dang ïashong ïasah ryngkat bad u lok jong ka khlem kano kano ka daw.
Kumta naduh katei ka por haka 16 tarik Nailar 2016, ki bahaiing hasem jong ka kila pynbeit ba ka iing ka sem bad ka kper ka phrah kan long noh jong u lok jong ka bad ki khun jong ka 2 ngut bad ka Regina kam don bynta eiei shuh ha katei ka nongrim da kaba la soi ïaka soskular ha ryngkat ki ar liang kur bad ka shnong, hynrei ha u snem 2019 ka Regina kala wan phai biang sha shnong ryngkat bad u lok ba thymmai u baka ïashong mynta, u ba kiba haiing ha sem bad ka shnong ka thaw kim pat ithuh ithaw satia.
Kane ka Regina kal leit shna iing bad kam kper haka jaka ba ka shnong kala dep ai jingbit ha kiwei kaba dei ka jaka jong u Sunday Light Thangkhiew bad ka Basuda Sankli, kiba kam bit ban shna iing bad rep kper hynrei kam kohnguh bad kam sngap satia kumta ka shnong kumjuh kumba la ïakut da ka dorbar hi u/ka ba pynkheiñ palat pud ïaki aiñ shnong un shah haka jingbishar ka shnong. Ngi pynshai paidbah ruh baka Dorbar Shnong jong ngi kam don kano kano ka rai ban tait ne beh shnong ïano ïano ruh haduh mynta.
Naka liang ka shnong kam shym poi pyrkhat baka Regina ka ujor ejahar sha Police Outpost Patharkhmah namar ka dei ka kam ba dang rit kaba dang lah ban ïakren pynbeit ha shnong phewse da khongpong ka shet ïaka shnong, kane ka jingleh ka Regina kala pynlong ïaka shnong ban sngewsih jur namar kumba long mynta ki lad jingmyntoi shimet naka sorkar ruh ka dang ioh lut kum ka bylla 100 sngi, khaw rashon, iing baduk PMAY-G ruh ka dang pyntrei mynta haka nongrim bala dep shna lypa u lok barim jong ka.
Ha shuwa baka kam kan ïaid sha ki bor bahalor naka liang u OC Patharkhmah u la khot ban ïasuk hynrei, kam pdiang bad ïa pynshai biang ïa katei ka kam sha ka shnong, ka EC jong ka shnong kaba la shong haka 8 tarik Ïaiong, 2022 kala phah 3 ngut ki bahaiing jong ka ruh kam wan satia kumta ka kam kala ïaid sha District Court, balei mih kine kiei kiei baroh namar bym don ka jingtip lem shaei ka lawei ka iing ka sem, ka lawei ki khun ki kti, ka lawei ka imlang ka shalang ka shnong ka thaw.
Shuwa ban tare ïa kano kano ka kam dei ban pyrkhat shuwa 3 sien namar naka liang ka shnong ka kyntu lang ïa baroh la ïa u riew shimet ne kino kino ki sengbhalang da leit shuwa sha shnong ban ïakren bad ki nongïalam shnong ban wad jingtip kaba bñiah, ym ban shim kabu naki social media, ban lait na kino kino ki jingjia ba sngewsih.
