Shillong, Naitung 26: Ka Meghalaya Public Service Commission (MPSC) ha ka sngi thohdieng ka la ong ba ki jingkynnoh leh shilliang bad ïashah shilliang halor ka jingpyntreikam ïa ka jingpynlong ïa ki examination ka long kaba khlem nongrim.
Ha ka jingthoh ka MPSC ka la ong ba hadien ba la pynbna ïa ki result jong ki additional list ki 62 ngut kiba ïakhun ïa ka MCS (Mains) examination, ka Commission ka la shah kynnoh ba ka la leh shilliang.
Ka Commission ka la kwah ban kren da kaba shai ba ka don ka jingtreikam kaba shai bad kaba lah ban shaniah kaba la pynneh ha kine ki eksam.
Kumta ban pynthikna ïa ki paidbah bad kiba ïakhun ka Commission ka la pynshai ba baroh, wat la ym baroh ki eksam paidbah, ka don ka lad ïa kiba ïakhun ban kyrpad kino kino ki jingbakla ha ki jingkylli ban lah ban ïakren ïa ki jingeh.
Baroh ki sienjam la dep ban shim ban pynthikna ba ki jingkylli ba la shna da kiba buh jingkylli ne ki Question Setter/ Examiner kin lait da ki jingbakla.
Ka MPSC ka la ong ba hadien ba la pynbna ïa ka Result MCS Preliminary Examination, ka la don kawei ka jingshah ujor ba la kyrpad sha ka Commission ha ka 25 tarik u Kyllalyngkot, 2024 ba la pan ïa ka Answer Key na ka bynta kane ka eksam. Ïa ka Answer Key la dep ban sam sha nongujor ha ka 6 tarik u Rymphang, 2024.
U ba kyrpad u la kynthoh sha ka Commission da kaba ong ba ka Official Answer Key jong ki 3 tylli ki jingkylli ki long kiba bakla bad u la aiti ïa kane ka jingkyrpad ha ka 9 tarik u Rymphang, 2024 ban kyrshan ïa ka jingkam.
“Ki riewshemphang kiba ka khmih bniah biang ïa ki jingkylli bad ki jubab ki la mynjur ba ka don ka jingbakla bad ka commission ka la shim khia bad rai ban khmih bniah ïa ki OMR sheet tang ïa ki 3 tylli ki jingkylli,” ka la ong.
