Jowai, Naiwieng 14: Ka Meghalaya Anganwadi Workers & Helpers Union (MAWHU) Central Body ha ka sngi Palei kala mih shakhmat ban pynshai paidbah halor ka jingkam bad ka jingmih jong kawei na ki seng Anganwadi napoh ka Rilum Jaiñtia ïa kaba la tip kum ka All Jaiñtia Anganwadi & Helper’ Workers Union, Jowai lyngba ki lad pathai khubor.
Ka General Secretary jong ka MAWHU ka Kong Diangtimai Lyngdoh haba pynshai ïa kane hadien ka jingïalang kala ong ïa ka seng jong ki MAWHU kala dep ban register hapoh ka Trade Union Act 1926 No-113 bad kaba la affiliated bad ka All India Trade Union Congress (AITUC) No.1852.
Hynrei ka jingkam jong ka kynhun All Jaiñtia Anganwadi & Helper’ Workers Union, ïa ki jingeh bad ki jingïa kynduh jong ki nongtrei Anganwadi Workers kala ïalam bakla pynban ïa kiba bun ba lang khamtam eh ïa ki dkhot ka MAWHU kiba don ha kylleng ka Ri-Lum Jaiñtia bad la ki jong ki nongkitkam kum na Saipung, Khliehriat, Laskeiñ, Thaslaskeiñ, Amlarem bad kiwei de kiba la trei borbah na ka bynta ka bha ka miat.
Ka la ong katkum ka jingkam jong katei ka kynhun AJA&HWU da kaba ong ba kim shem la ïoh ïa ka Honorarium, hynrei ïa kane ki nongtrei Anganwadi kila dep ïoh haduh u bnai October, 2025, katba na ka liang ka State Share Contribution kila dep ïoh jong u bnai March bad u April bad kaba sah yn sa ïoh hashwa u December.
Ka kong Lyngdoh kala pynsngew ha ka Joint Meeting kaba la long ha ophis ka Directorate ha ka 22 u October, 2025 la ïakren halor ki jingeh jong ki nongtrei Anganwadi bad ki ophisar bad kila kular ruh ban pyllait ïa ki pisa kiba dang sah kum ka State Share Contribution, ka Community Based Evens Incentive bad ka Poshan Tracker initiative jong ki Anganwadi Workers (AWWs) bad Anganwadi Helpers (AWHs).
Halor kane ka jingkam jong katei ka seng napoh Rilum Jaiñtia, na ka liang ka Meghalaya Anganwadi Workers & Helpers Union kaba la dep ithuh da ka sorkar mynta ka sngi kila leit kynduh ïa u District Programme Officer ICDS Cell West & East Jaiñtia Hills District ban pynshai ïa kane ka jingmih jong katei ka seng thymmai kaba la kam ïa ki jingeh ki bym dei.
Man ka por ka seng MAWHU ka juh trei na ka bynta ka bha ka miat jong ki nongtrei Anganwadi bad na ka liang ka sorkar ruh ka kloi ban ïarap, kumta ka kyntu ïa ki para nongtrei Anganwadi Workers (AWWs) bad Anganwadi Helpers (AWH) ba kin trei bha ïa ka kam katkum ka jingbthah jong ka sorkar.
Ka kong Diangtimai Lyngdoh kala pynshai ba katei ka jingkam jong ka All Jaiñtia Anganwadi & Helper’ Workers Union ha ki lad pathai khubor ba la dep kam long kaba dei namar ïa ki pisa ba dang sah yn sa ïoh hashaw u bnai Nohprah.
