Nongstoiñ, Jylliew, 14: Shi sngi hadien ba ka dorbar shnong Umwali ka la pynsaphriang lyngba ki lad pathai khubor, ba ka dorbar shnong ka pynrem jur halor ka jingkynnoh jong ka kong Kwistilda Lyngdoh Marshilong, ba u sordar shnong bad ka kynhun jong u ki leit thom bor ïa ka kper jong ka, katei ka longkmie kam banse ban pynshai ha kaba ka la pyni ruh da ki dulir bad ki kot ki sla kiiba la pynshisha ba katei ka kper ka dei hok ka jong ka.
Katkum ka dulir khyndew kaba dated Umwali 14/6/2018, katei ka longkmie ka la pynshai ba la kdew ba ka kyrteng jong katei ka kper ka dei ka Ranabumlon bad ki pud sawdong ki long kumne Mihngi khap bad ka surok sorbura shnong Umwali, sepngi khap wah Umlon ter ter, shatei khap kper jong u Trinly Thongni shathie khap surok sorbura shnong Umwali.
Nalor kata ha katei ka dulir la soi da u P.Syiemïong sordar shnong Umwali ryngkat ka muhor ryngkat ki trai kper ka Kwistilda Lyngdoh Marshilong, u kolosming Marweiñ bad la sakhi da u Piousding Lyngdoh bad u Pustar Lyngdohmarshilong. Nalor kata kawei pat ka jingpynshisha da u Acting Syiem ka hima Nongmynsaw kaba dated 27/7/2018 kaba don ïa ki juh ki pud sawdong bad kaba la soi da u Acting Syiem bad shon da ka muhor jong u.
Nangta sa kawei pat ka kot ba la pynshisha da u bah P.Syiemïong sodar shnong Umwali kaba dated Umwali 16/ 6/20018, kaba don kijuh ki pud sawdong kaba u la dep soi kyrteng bad shon da ka muhor jong u.
Kumta halor kitei ki jingpynshisha, katei ka longkmie ka la ong ba ka jingkynnoh jong ka dorbar shnong lyngba ki lad pathaikhubor ka long kaba lamler namar haba ki la dep ithuh ba katei ka jaka ka dei ka jong ka.
Hynrei mynta ki thombor biang bad ki mut ban knieh kumta halor katei ka jingleh jong ka dorbar shnong. katei ka longkmie kan ym sah jem hynrei ka ïai pyneh beit bad kan ym aili wat lada kan poi ha kano kano ka bynta ruh.
